Decemberske wudaće skići w předsłowje dohlad do wusahowaceho žiwjenskeho wobłuka Jakuba Čornaka: hudźba. W kotrej měrje běše so tuta do jeho dotalneho žiwjenja zapletła? Bórze wuńdźe jeho nowa tačel „po puću – unterwegs“. Čas nahrawanja mjenuje „zwoprawdźenje sona, w rock ‘n‘ roll skupinje piskać, hdźež so bjez miknjenja abo wjele słowow rozumiš.“ Andreas Kirschke je so z Hartmutom Hantšom rozmołwjał, kiž wuda z pomocu towarstwa Kólesko nowu Slepjansku chroniku. Wonaj rěčitaj wo pozadkach nastaća prěnjeho dźěla chroniki, wo tym, kotry wliw jeho njeboh nan Helmut Hantšo na nastajenje měješe a kotre wobsahi w 750lětnych stawiznach wsy wobswětluje. W druhim dźělu pojednanja Evelyn Fiebiger „Wón bě dobry Serb“ wo Arnošće Hatasu wopisuje pisarka dobu skutkowanja cyrkwinskeho wučerja w Hrodźišću, jeho wjeselo na wuwučowanju dźěći, jeho hódnoty jako zjawna wosoba a angažement w towaršnostnym žiwjenju a wosebje na dobro serbstwa.

Jeli pytane słowa 1–14 prawje wuhódaće, wučitaće we wuzběhnjenymaj rjadomaj dom w jednej wsy.

1 znaty wuměłc, 2 znajomosće, 3 přećel španisce, 4 jendźelski titul, 5 spěw jednotliwca, 6 dlěša europska rěka, 7 sušena trawa, 8 prazwěrjo skrótš., 9 dlěše powědančko, 10 družina žita, 11 napis na křižu, 12 wón šije, 13 hubjenstwo, nuza, 14 šulska žurla

W lětušim štwórtym čisle Serbskeje šule zaběra so Mgr. Kryštof Peršin Ph. D. ze zapřijećom biedermeier, kotrež móhło tež kluč za interpretaciju (serbskeje) literatury być. Wozjewimy přełožk prěnjeho kapitla jeho disertacije, kotruž je młody čěski wědomostnik lětsa w juniju wuspěšnje na Masarykowej uniwersiće w Brnje zakitował. Zajimawe je, zo Peršin zapřijeće biedermeier w zwisku z literaturu wužiwa. Hač so biedermeier tež w serbskej literaturje w šulskej wučbje wobjednawać hodźi, zhoniće klětu w prěnim čisle Serbskeje šule. Dale poručamy nastawk dr. Lubiny Malinkoweje, kotraž bě njedawno za dźěłarničku Bjesadow Serbskeho ewangelskeho towarstwa přehlad wo serbskej rěči a kulturje w digitalnym rumje zestajiła. To su hornjoserbske poskitki. Mnozy z nas, ale tež serbsce wuknjacy, njeznaja wšitke móžnosće, hdźe a kak móža online serbsce wuknyć abo hdźe nachadźeja poskitki, kiž jim pomhaja, serbšćinu lóšo do wšědneho dnja zapřijeć. Pobrachuje centralna, derje hladana strona.