Hrodźišćo po wosom lětstotkach

Hrodźišćo. We wobłuku swjedźenskeho tydźenja składnostnje 800. róčnicy prěnjeho naspomnjenja wsy Hrodźišćo přednošuje superintendent na wuměnku Jan Malink jutře, sobotu, w 19.15 hodź. w tamnišej farskej bróžni. Hesło stawizniskeho referata je „Hrodźišćo a wokolina 1222 – 2022“. Huslerka Susann Haufe a pianistka Erika Haufe budźetej přednošk hudźbnje wobrubić. Zastup je darmotny, přizamknu so reje.

Zahaja dźěćacu uniwersitu

Drježdźany. Wot póndźele, 5. septembra, móža so šulerki a šulerjo w starobje wosom do dwanaće lět za zymski semester dźěćaceje uniwersity Techniskeje uniwersity Drježdźany přizjewić, a to pod https://tu-dresden.de/kinder-uni/teilnehmen/anmelden. Dohromady je štyri online přistupnych čitanjow planowanych.

Wěsće w interneće

njedźelu hornjoserbsce

11:00 Łužica tutón tydźeń z aktualnymi powěsćemi a pokiwami

11:20 100 lět sport w Radworju

11:45 Kónctydźenske pokiwy

12:00 Nabožne wusyłanje

(Wito Sćapan)

po tym zbožopřeća

delnjoserbsce

12:30 Aktualny magacin, mjez druhim z přinoškom „30 lět Serbski institut“ a z „Dowolowymi impresijemi z Bretonskeje“

13:00 Tematiske wusyłanje: Serbski kwas

13:40 Nabožne wusyłanje

(Manfred Hermaš)

po tym zbožopřeća

„Swobodne městna! Serbske institucije nuznje nowych ludźi pytaja“, rěka nadpismo septemberskeho wusyłanja telewizijneho magacina Wuhladko. Tak pytaja projektnych nawodow, redaktorow, wobdźěłarjow spěchowanskich próstwow abo tak mjenowanych motiwatorow. Ženje hišće njebě potrjeba w serbskich institucijach tak wulka kaž tuchwilu. To zaleži na jednym boku na změnje generacijow. Na druhim boku nastawaja přidatne městna, na přikład w zwisku ze strukturnej změnu. Při tym maja wupisanja zhromadne wuměnjenje: wobknježenje serbskeje rěče. Wuhladko połoženje wobšěrnje wobswětluje.

Dalšej ćežišći magacina budźetej reportaža wo boju přećiwo afriskej swinjacej mrětwje we wokrjesomaj Budyšin a Zhorjelc z pomocu trutow kaž tež přinošk „Idole z interneta“ wo wuspěšnymaj serbskimaj influenceromaj.

Telewizija MDR wusyła Wuhladko jutře, sobotu, w 11.45 hodź. Wospjetowanje w samsnym sćelaku slěduje póndźelu, 5. septembra, w 6.45 hodź. Telewizija RBB pokaza magacin sobotu, 10. septembra, w 13.30 hodź. W mediatece MDR je Wuhladko wot jutřišeho cyłe lěto kóždy čas přistupne.