TSV Niederoderwitz – Viktoria Worklecy 0:3 (16:25, 15:25, 15:25)
Za Worklecy hrajachu: Jan Bětnar, Clemens Eckert, Pawl Hančik, Jurij Lipič, Marcel Rjelka, Józef Šnajder, René Šuster a Stephan Wjeńka. Trenar w Niederoderwitzu bě Ludwig Eckert.
Jědna wěc je lětsa hinaša pola Worklečanskich wolejbulistow. Byrnjež třo stajni hrajerjo wotprajili, poda so sobotu tydźenja sylny cyłk dźesać „młodych dźiwich“ do Žitawskich horin na prěnju wonkownu hru noweje sezony we wobwodnej lize. Cil, tři dypki docpěć, bě jasny. Kapitan Ludwig Eckert bě hišće lochko zranjeny a přewza rólu trenarja. Měješe wulki luksus, wšako móžeše kóždu poziciju sylnje wobsadźić. Tak měješe Pawl Hančik jako libero swój debit w trikoće Viktorije a pokaza jara dobry wukon.
Mustwo z Niederoderwitza hraješe chětro přestarjeny system z dwěmaj přistajerjomaj. Tak běše za hosći lochko nadběhi přećiwnika spóznać a je přeco zaso blokować. W prěnjej sadźbje wuhrachu Worklečenjo swoje wulkotne kmanosće a praskachu bul po bulu na polo hosćićela. Njetraješe dołho, a prěnja sadźba bě z 25:16 dobyta.