Na žurli wosady swj. Mikławša w Münsteru-Wolbeku su sobotu, 7. měrca, serbske jutrowne jejka debili. Katja Meyerowa a Feliks Brojer, w Münsteru bydlacaj Serbaj, staj na předstajenje tradicije přeprosyłoj. Dohromady 22 wosobow je přeprošenje slědowało, mjez nimi bě pjeć dźěći.

Na spočatku předstajištaj přednošowarjej wšitke serbske techniki debjenja jejkow. Feliks Brojer koncentrowaše so na wužrawanje a škrabanje a Katja Meyerowa předstaji wóskowanje a bosěrowanje jejkow. Jako přikład a za inspiraciju běštaj swójske debjene jejka sobu přinjesłoj. Tež dźěłowy grat a tradicionalne mustry móžachu sej zajimcy wobhladać. Po tym smědźachu sami jejka debić, a to pak w technice škrabanja abo w bosěrowanju. Referentaj dźěštaj wot blida k blidu, poradźowaštaj kreatiwnych a jim při dźěle pomhaštaj. Při tym wuwi so tójšto rozmołwow wo Serbach a jich tradicijach. Na dalšim blidźe běchu za přestawku zymne napoje, kofej a słódny tykanc přihotowane. Tykanc bě Leńka Meyerec napjekła. Wona so tohorunja na zarjadowanju wobdźěli a staraše so wo dźěći.