Prěnje wolejbulowe mustwo muži Viktorije Worklecy je sobotu do bołmončki znowa wobě domjacej hrě w Ralbicach dobyło. Z tym wostanu Worklečenjo doma w aktualnej sezonje bjez poražki. Hosćo w Delanach běchu wolejbulisća z Koblic a z Freitala.

ST Viktoria Worklecy –

Wolejsy Koblicy 3:2

(17:25, 25:16, 18:25, 17:25, 15:7)

Štóž Worklečanskim wolejbulistam hižo dlěje sćěhuje wě, zo sej přećiwo cyłkej z Koblic přeco ćežko činja. Dotal bě so nimale kóžda hra w tie-breaku skónčiła, tak tež prěnje zetkanje aktualneje sezony w septembru. Tehdy su hosćo 3:2 dobyli.

Tež tutón raz so hra za Viktoriju cyle špatnje započa. Domjacy so scyła do hry njenamakachu a nimale bjez wobaranja prěnju sadźbu 17:25 wotedachu.

Nawopačny wobraz skićeše so přihladowarjam w druhej sadźbje. Naraz běchu Worklečenjo wotućili a zamóchu so w nadběhach přesadźić. Na wonkownej poziciji staraše so wosebje Paul Hančik wo dobre přiwzaća a tež při wotwobaranju wón mustwo jara podpěraše. 25:16 za domjacych běše kónčny staw druheje sadźby.