Radwor. Na mjeztym dźewjate Pućo­wanje wědy derjeměća je Radworske sportowe zjednoćenstwo tež lětsa 1. meje přeprosyło. Něhdźe 40 staršich, młódšich a cyle młodych zajimcow so tónkróć na něhdźe 14 kilometrow dołhu čaru zwaži. Zamołwići běchu wospjet zajimawy a informatiwny wulět po blišej wokolinje Radworja přihotowali. Z Radworja wjedźeše puć přez Bronjo ze swojim słowjanskim hrodźišćom a Kamjenej hač do Chrósta nad Módrej Adriju. Po puću stajnje zaso skrótka pozastachu. Při tym zhonichu mjez druhim wo starodawnej železniskej čarje z Lubija a Wósporka, kotruž su po lěće 1900 twarić započeli a kiž je Radwor wjele lět samo z Berlinom zwjazała. Zbytki starych železniskich nasypow do dźensnišeho wo tym swědča.