Budyšin (SN/BŠe). W Budyskej pěstowarni „Kraj pjerachow“ Dźěłaćerskeho dobroćelstwa maja wot awgusta 2001 Witaj-skupinu. A koncept sej starši, kotřiž bydla w měšćanskej štwórći Strowotna studnja, jara waža. „Tuchwilu mam 17 dźěći w skupinje, a dalše přizjewjenja předleža“, praji kubłarka Stefanie Šramina. Lětsa rozžohnuje wona štyri dźěći do šule, kotrež stanu so přichodnu póndźelu z chowancami Serbskeho šulskeho a zetkawanskeho centruma Budyšin. „Při přizjewjenju dźěsća za Witaj-skupinu dźiwamy na to, zo starši serbšćinu tež po pěstowarskim času dale spěchuja“, kubłarka wuzběhnje.

Rozsudźa-li so starši za model Witaj, zeznawaja so jich dźěći nimo rěče tež z kulturu a tradicijemi Serbow. Kóžde lěto­ wuhotuje skupina na přikład me­jemjetanje a spěwa samozrozumliwje serbske pěsnički. „Štyri dźěći skupiny su ruskeho pochada, tamne su němske bjez serbskich korjenjow“, Radworčanka rozłožuje. Zajim někotrych staršich za serbstwo ju stajnje zaso překwapja.