Napjaty blidotenisowy duel 1. wokrjesneje ligi wotmě so w Njeswačanskej sportowni mjez ST Njeswačidłom a DJK Konjecami. Delenjo běchu z měšanymi začućemi k tabulkowemu susodej přijěli, dokelž móžachu so w zašłych štyrjoch hrach jenož jónu přećiwo njemu přesadźić. Start bě za nich přiwšěm optimalny. Dwójce Maćij Kokla/Alojs Čóška a André Čórlich/Michał Elstner swojej duelej dobyštej. Duwo Dierk Šewc/Pětr Bejma snadnje přěhra, tak zo mustwo z Delan přez dwójki 2:1 nawjedowaše. K startej do hrow jednotliwcow w hornim křižu Kokla a Šewc swojej partiji přěhraštaj. Tak steješe 3:2 za hosćićela. W srjedźnej křižnej hrě Čóška doby a Čórlich dyrbješe dypk wotedać. W delnim křižu přesadźi­štaj so Elstner a Bejma. Tuž hosćo znowa z 5:4 po prěnim kole jednotliwcow nawjedowachu. W druhim kole dypkowachu Šewc, Čórlich, Elstner a Bejma za serbske barby. Wjeselo Konječanow nad snadnym dobyćom 9:6 bě wulke.