SJ Chrósćicy

– SZ Drježdźany-Strěžin 2:4 (1:2)

Zestawa domjacych: M. Cyž – Pöpel (66. Domaška), B. Cyž, Hrdlitschka, F. Zahrodnik, M. Zahrodnik, Henčl, Runt (55. Žur), Młynk (66. Teichmann), Věchet, Němec

Chróšćanscy koparjo nastupichu minjenu njedźelu přećiwo direktnemu konkurentej z Drježdźan. Duel so hnydom turbulentnje započa. Po tym zo bě so Michał Młynk na prawym boku přesadźił, dósta Radim Věchet bul a zymnokrejnje k 1:0 trjechi, a to hižo w 5. min. Spěšne wrota pak hosći njemylachu. Koparjo z Drježdźan-Strěžina hrajachu koncentrowanje dale. W 11. min. woni z tróšku zbožom wurunachu. Wólny kop zleća do murje a bu za wrotarja Mateja Cyž njedźeržomnje wotfalšowany. W 13. min. slědowaše hnydom přichodny šok za domjacych. Bul bu wot praweje strony wótrje před wrota třěleny. Tu steješe Drježdźanski nadběhowar cyle swobodny a suny kulowatu kožu do wrotow. Tak steješe hižo 1:2. Po tym hra tróšku na tempje pozhubi. Hosćo koncentrowachu so bóle na defensiwu. Tak drje Chróšćenjo dominowachu, njemóžachu pak sej žane bytostne móžnosće wuhrać.