We wobłuku wjesneho swjedźenja a zdobom 600lětnych narodnin wsy přeprosychu sej Sernjančenjo minjenu sobotu wólnočasne mustwa na prěni soccercup. W 10 x 15 metrow małej koparskej klětce hrajachu mustwa stajnje wosom mjeńšin w formaće třo přećiwo třom.
W dwěmaj staflomaj po štyrjoch mustwach su wot napoł dwěmaj wo połfinale wojowali. Staflu A dominowachu koparjo Chróšćanskeje SJ Feliks Zahrodnik, Maksimilian Zahrodnik a Jan Bogusz – a woni su wšitke hry přećiwo młodym cyłkam z Róžanta, Sernjan a Lejna jasnje dobyli. Druhe městno wubědźi sej FC Sywo Lejno (Žurec koparjo z Lejna a k tomu Konstantin Hrjehor z Róžanta). W tamnej stafli přesadźi so team Sernjanskeje firmy MPT před miksmustwom z Róžanta a Sernjan. Hrańca docpě tu třeće městno před Sernjanskej młodźinu.