SJ Njebjelčicy
– HZ Hórnikečanski jězor 4:0 (1:0)
Zestawa domjacych: Hahn – Kral, Hanuza, Gödig, Haška (76. Čornak), Pawlik, O. Domš, Hoelzel, Lejnart, Schulze (73. Šołta), Korjeńk (73. Wagner)
Dalši duel tabulkoweju susodow bě minjenu njedźelu w Njebjelčanskim stadionje při Jaworskej rěčce. Dypkowa flawta do toho we Wóslinku pohnu trenarja hosćićela Handrija Krawčika do hry razniši ton wolić. Hižo w 3. min. poradźi so domjacym wuspěšna ofensiwna akcija, po tym zo běchu woni porjadny ćišć wukonjeli a skomoleny pas do nohow Roberta Lejnarta prowokowali. Rodźeny Worklečan njeda so dwójce prosyć a sam na wrota běžo k 1:0 wotzamkny. W přichodnej akciji pósła Leopold Hoelzel ze srjedźneho pola Sandra Schulzu do běha, kiž bul Handrijej Korjeńkej wotpołoži. Škitar dalše wrota runje hišće tak wotwobara. Po dobrej spočatnej fazy pak Njebjelčenjo bjez spóznajomneje přičiny měr w swojich akcijach zhubichu. Dołhe třělwy a skomolene přihrawki zmóžnjachu hosćom wjacore dobre ofensiwne akcije. Tak tež we 38. min., jako lećeše po róžku do směra na wrota hłójčkowany bul jeno snadnje nimo žerdźe.