Połčničanska hrodowa klinika VAMED so zaměrnje wo powołanski dorost na polu hladanja stara. Tuž so w brazilskim São Paulu tuchwilu 20 hladarjow na zasadźenje we Łužicy přihotuje.

Połčnica (SN/mwe). Najebać to zo w chorownjach, starownjach kaž tež rehaklinikach fachowy personal, hladarjo w medicinskich a hladansko-terapeutiskich wobłukach faluja, je jich wjele móžnosćow, wosebje młodych ludźi za tele powołanja zdobyć. To měni Połčničanski jednaćel kliniki Carsten Tietze. Šef hrodoweje lěkowarnje podšmórnje, zo chcedźa wot klětušeho w domje zaso wučomnikow za hladanje potrěbnych wukubłać. Wabjenje za tuchwilu po tysacach falowacych hladarjow tež w Hornjej Łužicy měło so doma w swójbje, w šuli a hdźežkuli dru­hdźe započeć.

Wažne po słowach Tietzy w našej towaršnosći bě, sej tajke njesebične powołanje česćić. „Medije su tohorunja wužadane“ a njeměli w reportažach w prěnim rjedźe wo skandalach w hladarnjach rozprawjeć. Měli sej wuwědomić, zo njepomha měć tych, kotřiž so wodnjo a w nocy wo chorych staraja, za bitych. „Smy woprawdźe wšitcy wužadani.“