Předawarnje rozdźělnje na potrjebu ludźi reaguja
Budyšin/Köln (SN/jak/MiR). Nawoda Edeka w Budyskim nakupowanskim centrumje Husarenhof Jörg Herrmann dźiwa na to, zo je dosć wotstawka mjez sobudźěłaćerjemi a kupcami. Hewak kupcam z klučom přistupny nuznik, wón praji, pak „je tuchwilneje situacije dla zawrjeny“. Na špundowanju pokazuja žołte markěrowanja při kasy na wotstawk, kiž wučinja połdra metra, kotryž maja kupcy mjez sobu dodźeržeć. Zdobom pak mysli Jörg Herrmann tež na ludźi, kotřiž njemóža tuchwilu sami do wobchoda hić a nakupować. „Po dorěčenju z mějićelom našeho nakupowanišća Fabianom Zellmerom smój so dojednałoj, zo jim tež dale po potrjebje twory domoj wozymy.“ Ludźo móža do Edeka zazwonić a sej twory po swójskej potrjebje skazać. Při tym smědźa z kompletneho poskitka wolić. Za posrědkowanje, to rěka transport, maja woni pjeć eurow nimo zličbowanki za nakup zapłaćić. Wosebity serwis to, kotryž pak jeničce za Budyšanow płaći. Ludźi na wsach nakupowanišćo na te wašnje zastarać njemóža.
