Z něhdźe 1000 přistajenymi a 75 wukubłancami je Wojerowski Klinikum Łužiskeje jězoriny najwjetši dźěłodawar regiona. Přistajeni dźěłaja tu w 14 fachowych wotrjadach a na třoch institutach. Dohromady 24 rěčow mjez nimi zasłyšiš – tež serbšćinu. Andreas Kirschke je so z jednaćelku klinikuma Juliane Kirfe wo šansach a zaměrach projektow we wobłuku změny strukturow rozmołwjał.

Knjeni Kirfe, kotre šansy za klinikum widźiće w změnje strukturow?

J. Kirfe: Šansy su enormne, wšako je město Wojerecy móhłrjec w centrumje regiona změny strukturow. Runje strowotnistwo steji před hoberskimi wužadanjemi: Kak zmištrujemy wuspěšnje digitalizaciju, kak zawěsćimy nadal wulku ličbu dźěłowych městnow, kak nawabimy dołhodobnje a wobstajnje dobrych fachowcow? Na wšitke tute prašenja dyrbimy wotmołwy namakać.

Je klinikum na změnu strukturow derje dosć přihotowany?