Budyšin (SN/MiR). Na Budyskej Sukelnskej pola towarstwa „Dźěłań dźeń“ kaž tež w Serbskim domje pola projekta LUCIJA hraja nowe medije wažnu rólu. „Wěnujemy aktualnu dźěłarničku wuwiwanju aplikacijow“, rjekny projektowy koordinator LUCIJE Michał Cyž, „naš zaměr je, na hižo předležacym powjerchu swójske objekty a grafiki instalować.“ Kónčny produkt ma być wupłód zwjazanosće techniskich wuměnjenjow z fantaziju młodych ludźi, kotřiž so w koděrowanju wuspytaja. Z koděrowanjom dawaja młodostni programej přikazy, zdobom zwučuja so we wužiwanju kompjuteroweje rěče. „Nam słuži za to digitalna rěč Java Script, kotraž hodźi so tež za produkty w serbskej rěči wužiwać“, rjekny Feliks Šołta, referent dźěłarnički. Kilian Bjarš měni: „Sym hižo dołho na tym zajimowany wuslědźić, kak móžu w programach dźěłać.“ A Simon Herfurth rjekny: „Mje woprawdźe wabi swójsku aplikaciju wuwiwać.“ Wobaj so toho nadźijataj, zo budźe tónle pjatk na wobrazowce produkt widźeć, kotryž staj kóždy po swojim słodźe na hižo wobstejacej platformje wuwiłoj.