Awtor dźensa

Jan Hrjehor

„Šokolodu, hólcy! Wzmiće sej šokolodu sobu!“, běchu słowa Sulšečana Achima Miča, kotrež bě wón lětsa spočatk lěta přećelej sobu na puć směr Słowjenska dał. Po torturje w juliju 2020 na 2864 metrow wysoki Triglav, na najwyšu horu Słowjenskeje, dyrbjachmy swoje přihoty lětsa na kóždy pad polěpšić. Tak mějachmy po doporučenju Achima Miča lětsa při druhim postupje na wjeršk tři wulke tafle šokolody z worješkami sobu, kotrež nam woprawdźe pomhachu. Fyzisce a tež psychisce! Snano pak bě měšeńca magnezija – tež to bě pokiw – a bruneje słódkosće prawa receptura, zo njebych doma wospjet po wšěch štyrjoch z awta wulězć a so tydźeń dołho wo swoje ćěło starać dyrbjał, kaž to w lěću 2020. Zabyć njesměm na pućowanskej kijej. Tež tutón pokiw bě rozsudny a pomhaše mi a třom přećelam horu horje a tež horu dele. Lětsa w pražniku wjedźeše nas naš druhi postup na wjeršk mjenujcy po hinašej, dlěšej a hišće rjeńšej turje, hač před pjeć lětami.