Hlinowski SK – SJ Chrósćicy 4:2 (2:0)

Zestawa SJ Chrósćicy: Škoda – Zynda (46. Bjeńš), F. Cyž (54. Wićaz), Młynk, Rätze, L. Zahrodnik, Hawš, G. Zahrodnik, Graf, Wornar (58. Handrik), Šiman (58. Bogusz)

Njedźelu dojědźechu sej Chróšćenjo na znate hrajnišćo do Halštrowa, hdźež woni tučasnje tež trenuja. Tam wojowachu přećiwo postupnikej z Hlinowca wo wažne dypki.

W prěnich mjeńšinach zetkanki so bul často mjez šěsnatkomaj pohibowaše. Kaž wočakowane wobaj cyłkaj porjadnje do hry startowaštaj. Z prěnjej móžnosću docpěchu domjacy nawjedowanje. Chróšćenjo běchu bul před šěsnatku zhubili a nadběhowar z Hlinowca jón po flance do wrotow k 1:0 suny (15.). Po tym so ničo dale na hrě njezměni. Hosćo spytachu sej w ofensiwje móžnosće wuhrać. Tola w prěnim połčasu njebuchu woni před wrotami něhdyšeho wrotarja SJ Chrósćicy Markusa Šmita strašni. Na tamnej stronje běchu Hlinowčenjo efektiwni a w 30. min třěli Luca Cedric Schmidt 2:0. Wotmołwu na druhe wrota Chróšćenjo njemějachu.