Překwapjenka za předsydstwo a kuratorij załožby Wnučkokmanosć
Njebjelčicy (SN/MiR). Załožba Wnučkokmanosć ze sydłom w Njebjelčicach dźěła nětko z prawnisce podkładźenym přizwolenjom jako załožba byrgarskeho prawa. Jedyn z prěnich nadawkow předsydstwa je załoženje konta na bance. Dotal běchu financielne naležnosće w dobje załoženja załožby z pomocu rukowaćelskeho konta rjadowali. „Tam składowachmy w prěnim rjedźe pjenjezy załožićelow a załožerkow kaž tež trěbny minimalny kapital, kiž wostanje trajnje na konće jako wěstota“, rozłožuje předsyda załožby Tomaš Čornak a doda: „Tele pjenjezy su wěsty zakład za aktiwne dźěło cyłka.“ Z prawokmanosću móža dale a sylnišo za dalšimi sponsorami pytać a próstwy wo spěchowanje zapodawać.
