Socialne ministerstwo zawrjenju porodźernje njezadźěwa

Drježdźany/Kamjenc (SN/MiR). Ručež bě ministerstwo za socialne, strowotu a towaršnostnu zhromadnosć (SMS) Sakskeje 24. apryla wo tym zhoniło, zo chce Kamjenska chorownja swj. Jana porodźernju a gynekologiju zawrěć, je wone započało analyzować, kak hodźi so zastaranje zawěsćić. To zdźěli rěčnica ministerstwa Juliane Morgenroth na naprašowanje Serbskich Nowin. Wosebje su měnliwu docpějomnosć a zwólniwosć wokolnych chorownjow k přewzaću porodźacych kaž tež pacientkow gynekologije pruwowali. Na to stej ćežišćowej zastaraćelej, Wojerowski klinikum Łužiska jězorina a Budyski klinikum Hornja Łužica, zdźěliłoj, zo móhli w padźe zawrjenja zastaranje přewzać.