Na wuchodosakskim finalu we wubědźowanju „Młodźina trenuje za olympiju“ rjany wuspěch žnjeli
Po wurjadnych wuslědkach w předkołach dojědźechu sej volleyballisća 9. a 10. lětnika Serbskeho gymnazija Budyšin (SGB) k Olbersdorfskemu jězorej pola Žitawy, zo bychu nětko w pěsku swoje kmanosće dopokazali. Turněr wotmě so po systemje „best of three“, tak zo so jednotliwe rozestajenja 3:0 abo 2:1 skónčichu. Mustwa wobstejachu stajnje z hólčeje a holčeje dwójki kaž tež z měšaneho porika, kotrež hrajachu po dwěmaj sadźbomaj hač do 21 dypkow.
Wonkowne wuměnjenja běchu z 20 stopnjemi dobre. Sylny wětřik pak načini beachvolleyballistam problemy. Druha partija SGB přećiwo Gymnazijej Christiana Weisy Žitawa bě předrozsudźaca. Dwójka Józef Hantuš z Radworja / Matej Cyž z Chrósćic přesadźi so w prěnjej sadźbje z 21:14 a nawjedowaše druhu hižo z 20:19. Jenički dypk jimaj falowaše, krótko po tym pak juskaštaj Žitawčanaj nad snadnym 20:22. Rozsudny třeći přechod bě znowa dramatiski. Při stawje 13:13 njekiwaše serbskej dwójce trěbne zbožo, wona přěhra sadźbu z 13:15.