Prěni raz w stawiznach Serbskeje wyšeje šule Ralbicy su šulerjo a wučerjo swójski sponsorowy běh přewjedli. Dojednali běchu so na tajki we wobłuku prěnjeje šulskeje konferency spočatk šulskeho lěta 2019/2020. Tak poda so dźeń do pokutneho dnja 104 běharkow a běharjow na 400 metrow dołhu kołočaru w Ralbičanskim Stadionje přećelstwa. Holcy a hólcy pjatych do dźesatych lětnikow, kaž tež někotři wučerjo mějachu hodźinu chwile, telko kołow naběhać kaž móžno. Wšitcy pak w samsnym času njeběhachu, jenož něhdźe połojca bě w samsnym času na běžni. Po sportowej akciji rjekny šulska wjednica Milenka Koberowa, „zo su so wšitcy jara angažowali a z cyłej wutrobu při wěcy byli.“
Do sponsoroweho běha bě sej kóždy wobdźělnik jednoho, dweju abo wjacorych darićelow pytał. Podpěraćeljo běchu mjenujcy sportowčam a sportowcam w předpolu běhanskeje akcije za kóžde naběhane koło wěstu sumu pjenjez slubili.