Kaž kóžde lěto k zazběhej adwentneho časa su tež lětsa zaso w Budyšinje tak mjenowany abi-cup w sportowej družinje wolejbul přewjedli. Wulki turněr wotmě so w ćěłozwučowarni na Schillerowych zelenišćach z přichodnymi maturantami sprjewineho města.
Dwě wolejbulowej mustwje Serbskeho gymnazija Budyšin (SGB) stej so wobdźěliłoj, šulerjo 11. a 12. lětnika. Dwanatkarjo nastupichu w stafli A, kotraž běše chětro wurunana. Dwě z třoch hrow su woni z 25:13 a 25:17 jasnje dobyli. Šulerjam Schilleroweho gymnazija pak z 19:25 podležachu. Přiwšěm dosahaše za prěnje městno w předkole.