Ralbicy. Aktiwni čłonojo dobrowólnych wohnjowych woborow gmejny Ralbicy-Róžant su jutře, sobotu, we 18 hodź. na hłownu zhromadźiznu do jědźernje Ralbičanskeje šule přeprošeni. Na dnjowym porjedźe steja mjez druhim rozprawy nawodow wjesnych woborow a nawody gmejnskeje wobory. Dale wjesnjanosta Hubertus Ryćer zasadźenja w lěće 2025 wuhódnoći a jednotliwych wobornikow powyši a počesći.
Kachlestajer powěda
Hórnikecy. Kachle a stawiznički kachlestajerja steja jutře, sobotu, w srjedźišću zarjadowanja Hórnikečanskeje energijoweje fabriki. Započatk budźe w 14.30 hodź. Z hosćom budźe kachlestajer Frank Altmann z Łaza. W rozmołwje z nim póńdźe wo jeho powołanje, wo jeho wosobinski zwisk k zběrce kachlow w energijowej fabrice a wo praktiske pokiwy za kóždeho, kiž doma kachle tepi. Wopytowarjo móža jeho radlubje so prašeć. Energijowa fabrika chce wot lěta 2028 zaso dźěl swojeje 800 objektow wopřijaceje zběrki kachlow zjawnosći pokazować. Zastup za jutřiše zarjadowanje płaći pjeć eurow. Wšitcy zajimcy su wutrobnje přeprošeni.
Powjedźe po wustajeńcy
