Zachowanje rěče a dźěło młodźiny dale najwažnišej
Wotrow (SN/MWj). Po lětomaj přestawki ma župa „Michał Hórnik“ zaso županku. Chróšćanka Zala Cyžowa bě na župnej hłownej a wólbnej zhromadźiznje minjeny pjatk we Wotrowje zwólniwa, za tele zastojnstwo kandidować. 46 delegatow Domowinskich skupin a towarstwow ju jednohłósnje wuzwoli, na čož jej trójnu Sławu zanjesechu. W swojich kónčnych słowach Zala Cyžowa rjekny, zo bě so nadźijała, zo budźe dalšeho, snano młódšeho kandidata. Přiwšěm je sej wěsta, zo móža ze sylnym župnym předsydstwom přichodne nadawki zmištrować. W pjatk wuzwolenym dźesać wosobow wopřijacym župnym předsydstwje su nimo wjacorych dotalnych čłonow tež nowe mjezwoča, kaž Chróšćan Jürgen Njek a z 19 lětami najmłódši čłon Rafael Wjacławk z Wotrowskeho młodźinskeho kluba.