Čłonojo předsydstwa Maćicy Serbskeje su so wčera w Choćebuzu zetkali. Na posedźenju wobdźěli so tež tamniši generalny superintendent Martin Herche. W srjedźišću wuradźowanja steješe połoženje ewangelskich Serbow w Delnjej Łužicy.
Choćebuz (ap/SN). Je hižo wjele lět z tradiciju, zo zetka so předsydstwo Maćicy Serbskeje jónu wob lěto w Delnjej Łužicy. Tam zeznajomja so z dźěławosću jedneje serbskeje institucije abo serbskeho towarstwa. Tohodla wotmě so srjedowne posedźenje předsydstwa w Choćebuskim ewangelskim centrumje hromadźe z předsydstwom delnjoserbskeje Maśicy Serbskeje a z předsydstwom Spěchowanskeho towarstwa za serbsku rěč w cyrkwi.