9. nowembra 2016 zemrě w Budyšinje redaktor­, wučer kaž tež sportowc Józef Kilank. Hakle 29. oktobra bě 80. žiwjenske lěto dokónčił. Wo njeho žaruja mandźelska Monika, dźěći Sabina, Blanka a Tomaš, přiwuzni, něhdyši kolegojo a wosebje tež serbscy přećeljo sporta.

Rodźeny w Kanecach chodźeše Józef do zakładneje šule w bliskim Wotrowje, hdźež bě tež Jan Meškank jeho wučer. Dalši žiwjenski puć wjedźeše jeho do Budyšina na Serbsku wyšu šulu. Po wuspěšnej abiturje 1954 započa wón w Małym Wjelkowje na Serbskim pedagogiskim instituće wučerstwo studować.

Nadobo poskićichu jemu w redakciji tehdyšeje Noweje doby městno sportoweho redaktora. Nětko njebě wón jenož wšudźebył na domjacych sportnišćach, ale měješe tež zbožo, směć swětowe mišterstwa­ w kopańcy 1958 w Šwedskej a olympiske hry 1960 w Romje sobu dožiwić.­ Ja sam mějach składnosć, z nim sportowe wjerški kaž kolesowanske swětowe mišterstwa 1960 na Sachsenringu widźeć.