Wo dalšim zhromadnym dźěle ze Serbskim šulskim towarstwom rěčeli

Budyšin (SN/JaW). Zwjazkowe předsydstwo Domowiny wotpokazuje plany braniborskeho ministra za kubłanje, młodźinu a sport (MBJS) Güntera Baaski (SPD), chcyć wučbu serbšćiny wobmjezować. Gremij žada sej „zasadne zaručenje serbšćiny na kóždej šuli, hdźež sej to starši přeja“, rěka w stejišću zwjazkoweho předsydstwa. Na nje bě so 14 přitomnych z cyłkownje 28 přisłušacych čłonow na poslednim wuradźowanju do hłowneje wólbneje zhromadźizny třěšneho zwjazka sobotu w Budyšinje dojednało. Dale sej gremij žada, zo njesmědźa so na sensibelnym polu kubłanja „žane skrótšenja dopušćić. Nawopak ma so wšitko za to činić, zo bychu wšitcy zajimcy móžnosć měli, bjez zadźěwkow serbšćinu wuknyć.“ Zdobom namołwichu wšěch čłonow župow a towarstwow Domowiny, so protestej přizamknyć a so na podpismowej akciji přećiwo planowanemu wukazej wobdźělić.