Rowno (JoS/SN). Přihoty za program na 18. dworowym swjedźenju na Njepilic statoku 24. septembra stejachu w srjedźišću hłowneje zhromadźizny spěchowanskeho towarstwa Njepilic dwór minjeny pjatk w Rownom. Program je jasny a wšitcy­ čłonojo su přihłosowali. Předsyda Manfred Nikel bě zwjeseleny, zo njeje so na zhromadźiznje ničo dlijiło. „Najwažniše wšak je sej nadawki a zamołwitosće za tajke zarjadowanje porjadnje rozdźělić“, wón rjekny. „Smy z nazhonjenjow wuknyli a našim čłonam plan předpołožili, kotryž lětnje wospjetujemy. Tak kóždy z pomocnikow wě, kak móže towarstwo skutkownje podpěrać.“

Program 18. dworoweho swjedźenja na Njepilic statoku 24. septembra nawjazuje najprjedy raz na znate z minjenych lět. Budu to dwurěčna bohosłužba, burske wiki ze serbskim wobjedom a rańše piwko z hudźbu. Popołdniši program steji pod hesłom „Bajkojte na Njepilic statoku“ z hosćimi z Barbuka, Ćiska a z čěskeje strony Rudnych horin. Pobrachować njesmědźa wězo chowancy Rownjanskeje Witaj-pěstowarnje „Milenka“ kaž tež Serbskeho dźěćaceho a młodźinskeho ansambla Slepo.