Lubij (cyna/SN). Minjeny pjatk wulećachu sej čłonojo towarstwa Přećeljo Smolerjec kniharnje do Lubija, zo bychu na slědach serbskeje literatury jeje tworićelow Rudolfa Mjenja, Michała Šewčika a wosebje tež Jurja Wingera, kiž je před sto lětami zemrěł, wopominali.
Jurij Winger njeje nam jenož powědančka zawostajił, kaž znatu historisku powědku „Hronow“, kotraž horjo w Třicećilětnej wójnje dokumentuje. Wón bě tež přełožowar, pisaše reportaže a dźiwadłowe hry. Wot lěta 1903 hač do swojeje smjerće bě farar w Lubiju. Tuž wopytachu čłonojo towarstwa najprjedy katolsku cyrkej Marije mjena, hdźež bě do Wingera hižo Šewčik skutkował.
Michał Šewčik bě prěni serbski duchowny w Lubiju a spisaćel kulturnohistoriskich studijow, basnjow, směškow a powědančkow. Nimo toho bě tež prěni serbski knihownik Serbskeho seminara w Praze. Po Wingeru přińdźe do Lubija farar Pawoł Šołta. Wón započa tamnišu farsku chroniku pisać.
