Pod hesłom „Su jenož ,mužojo hódni wěčnoh wopomnjeća‘?“ namołwja Maćica Serbska na zjawnu diskusiju wo tym, hač njeměli tekst serbskeje hymny změnić.
Budyšin (SN/CoR). Předsydstwo Maćicy Serbskeje je na swojim wčerawšim posedźenju wobzamknyło wozjewić namołwu pod hesłom „Su jenož mužojo hódni wěčnoh wopomnjeća“?, z kotrejž chcedźa přeprosyć na zjawnu diskusiju wo serbskej hymnje, a to tež online na stronje .
Pozadk mjez druhim je, zo „su w towaršnostnym diskursu słyšeć hłosy, kiž žadaja sej wjace widźomnosće žonow nic jenož w zjawnosći, ale tohorunja w rěči. W tutym zwisku zwurazni so w serbskej zjawnosći tež prašenje, hač njeměli tekst serbskeje hymny změnić, wšak njeskutkowachu a njeskutkuja jenož mužojo na dobro serbstwa“, kaž w namołwje Maćicy Serbskeje rěka.