SFAW přeproša pod hesłom „40 lět a žadyn kónc wotwidźeć njeje“
Wudwor/Hórki (SN/MiR). Wot 15. do 17. julija 2022 wotměje so na Smolic statoku w Hórkach wosebity swjedźeń. Nimale tři lěta tomu je, zo bě Serbski folklorny ansambl Wudwor (SFAW) dobył hłowne myto we wobłuku wubědźowanja Swobodneho stata Sakskeje „Čiń sobu!“. 20 000 eurow běchu připrajene dóstali, zo móhli lěto na to swój jubilej składnostnje 40. róčnicy wobstaća lajskowuměłskeho ćělesa wuhotować. Z połnym zapalom započachu jón tehdy planować. Korona pak je wšitkim přihotam zadźěwała. Spěšnje bě amtěrowacemu předsydźe Ambrožej Handrikej jasne, zo njehodźi so projekt w lěće 2020 zwoprawdźić. „Njeličachmy pak z tym, zo budźemy dwě lěće čakać dyrbjeć, prjedy hač móžemy jubilej woswjećić“, wón rozprawja, „Wjeselimy so tuž, zo móžemy z połnym elanom a mnohimi idejemi nětko na nowy termin so měrjo dźěłać.“ Jednorišo było bjezdwěla by so myta wzdać a wužić přichodnu składnosć za tři lěta, swjećić 45lětne wobstaće ansambla. To pak chcyli njejsu. Z pozadkom, zo měješe so swjedźeń w juniju 2020 přewjesć, su do nadawka dali někotre nowe drastowe dźěle zhotowić.