Krajej přesahowacy projekt změny strukturow wčera w Lubinje zahajili

Lubin (SN/at). Braniborsko-sakski zhromadny projekt we wobłuku změny strukturow dotalnu kolesowarsku šćežku „Serbske impresije“ na łužisku „Čaru kultury a rěče“ wutwarić su wčera w delnjołužiskim Lubinje zahajili. Po tym zo běchu wokrjesy Sprjewja-Nysa, Dubja-Błóta, Hornje Błóta-Łužica, Budyšin, Zhorjelc a bjezwokrjesne město Choćebuz ­hižo do toho swoju podpěru w deklaraciji wotpohlada wobkrućili, dorozumichu so zastupjerjo wobeju krajow, Hospodarskeho regiona Łužica (WRL), Sakskeje agentury za strukturne wuwiće (SAS), wo­krjesow w serbskim sydlenskim rumje, turistiskich zwjazkow a Domowiny na dalše postupowanje.