Parlamentariska přirada Załožby za serbski lud pod nawodom Marka Šimana (CDU) měješe wčera wšelake łoskoćiwe temy na starosći. A gremij njeboji so jasnych konkluzijow.

Podstupim (SN/mb). Najwjac chwile su sej čłonojo parlamentariskeje přirady Załožby za serbski lud na swojim posedźenju w Podstupimje za temu prawicarskich podawkow na šuli „Mina Witkojc“ w Bórkowach wzali. Kaž předsyda přirady, zapósłanc sakskeho krajneho sejma Marko Šiman (CDU), našemu wječornikej zdźěli, su so pola dweju zastupjerjow nutřkowneho ministerstwa Braniborskeje za aktualnym stawom informacijow policije a wustawoškita wobhonili. Hladajo na zjawne škaranje mjez druhim z nalěpkami a w interneće přećiwo wučerjomaj, kotrajž staj so prawicarjam wobarałoj, praji Šiman: „Tajka hida nima ničo z politiku činić.“ Te wobrazy na přikład z prawicarskim nalěpkom „Zmińtaj so do Berlina!“ běchu „grawoćiwe“. Wažne je při „problemje prawicarskeho wuwića, spěšnje reagować a eskalaciji zadźěwać“.