Mamy mnohe wuznamne serbske a druhe wosobiny, kotřiž so w běhu stawiznow za wuchowanje, daledawanje a wuwiwanje delnjoserbskeje rěče zasadźowachu, kotřož su knihi wudali a z tym zakład za delnjoserbske pismowstwo tworili abo cyrkwinske teksty a bibliju přełožowali. Mnozy su so nowinarstwu, někotři literaturje a druzy gramatice abo prawopisej wěnowali. Jedyn z nich, kiž je so wosebje w zašłych lětdźesatkach na wšelakich rěčnych polach za delnjoserbšćinu zasadźał a ju w jeje dźensnišej formje rěčnikam a wuknjacym spřistupnjał – hač we wučbje, wučbnicach abo ze słownikami – je Erwin Hanuš. Slawist, wučer, docent, redaktor rozhłosa, awtor, přełožowar, rěčespytnik a redaktor Pratyje swjeći dźensa swoje 90. narodniny.