Njenamaka-li so kompromis, hrozy krajej statny bankrot

Brüssel/Athen (dpa/SN/K). Nowy pospyt w prócowanjach za rozrisanje grjekskeje krizy: Němska kanclerka Angela Merkel (CDU) a francoski prezident François Hollande zetkataj so dźensa wječor w belgiskej stolicy na kromje wjerška EU–Łaćonska­ Amerika dalši raz z grjekskim premierom Alexisom Tsiprasom. Po móžnosći chcetaj z nim namakać kompromis we wadźeńcy z wěrićelemi jich žadanjow na Grjeksku dla. Athenske knježerstwo bě wčera w nocy nowe namjety za reformy předpołožiło, kotrež wšak Brüssel nima za dosahace. Pječa wostawaja wone za podatymi zaměrami, kotrež by Grjekska dyrbjała spjelnić, zo móhła swój budget saněrować.