Swoje narodne a nabožne ideale čas žiwjenja wobchował
Spěšnje roznjese so wutoru rano powěsć, zo je daloko znaty Konječan Jan Šołta w kruhu swójbnych w Drježdźanskej chorowni zemrěł. Wón bu 83 lět a bě čas žiwjenja z ratarstwom, pčołarstwom a serbskim spěwom zwjazany.
9. hodownika 1941 narodźi so Jan Šołta serbskej ratarskej swójbje w Salowje. Nan bě we wójnje padnył a tak je so njeboćički hižo za šulski čas z ratarskim dźěłom zeznajomił. 16 hektarow wulke swójbne ratarstwo dźě měješe wobhospodarjene być. Po wopyće šulow w Koćinje a Kulowje da so wón we Wojerecach na ratarskej šuli wukubłać a dźěłaše w domjacym ratarstwje. Jako pak nuzowachu mać 1959 do prodrustwa, so Jan z ćežkej wutrobu ratarskeho dźěła wzda. Na to zasłužeše sej swój wšědny chlěb we Wojerowskej twarskej uniji, po překubłanju jako powołanski šofer. Po słužbje we wójsku dźěłaše wón w Salowskej cyhelnicy hač do jeje zawrjenja 1970. Přechodnje dźěše Jan Šołta do lěsnistwa a přińdźe po tym do Ralbičanskeje prodrustwoweje zamkarnje a pozdźišo do zamkarnje Ralbičanskeje kormjernje swini.
Přistajeni komunow přežadani
Podstupim (dpa/SN). K zahajenju tarifowych jednanjow za přistajenych Zwjazka a komunow warnuja dźěłarnistwa před ćežkej krizu w zjawnej słužbje. „Tójšto komunow je na kromje dźěłakmanosće, přistajeni su přežadani“, rjekny předsyda dźěłarnistwa ver.di Frank Bsirske powěsćerni dpa. „Hdyž spěšnje njejednamy, hrozy kolaps.“ Hižo nětko je poł miliona městnow w zjawnej słužbje njewobsadźenych. Dźěłarnistwo žada sej mjez druhim wosom procentow wjace mzdy.
Warnuja před lutowanjom
Berlin (dpa/SN). Wjacore wulke akademije wuměłstwow warnuja před sćěhami skrótšenjow na polu kultury. „W času polarizowaneho swěta móžetej wuměłstwo a kultura towaršnostnej zhromadnosći a mjezynarodnemu wujednanju přinošować“, pisaja prezidenća šěsć němskich akademijow w zhromadnym lisće. Pozadk su lutowanske plany w mnohich kulturnych institucijach Němskeje. Jeničce w Berlinskim kulturnym referaće chcedźa 130 milionow eurow zalutować.
Ukrainske truty Rusku trjechili
Wichor Éowyn tuchwilu w Sewjernej Irskej a dźělach Wulkeje ...
Trump EU wumjetuje
BSW: Wo renće wothłosować
Skućićel w psychiatriji
Aschaffenburg (dpa/SN). Po nadpadźe z nožom w Aschaffenburgu z dwěmaj mortwymaj je sudnica hamtskeho sudnistwa podhladneho skućićela do psychiatriskeje chorownje zapokazała. Tajki wukaz je z wašnjom, hdyž maja pokiwy na to, zo njebě muž za čas njeskutka psychiskeje chorosće dla winykmany.
Z Afghanistana pochadźacy muž bě minjenu srjedu w parku města dospołnje njewočakowano dwě lěće stareho marokkoskeho hólca a 41lětneho Němca zakłół. Nimo toho zrani wón dwě lěće staru holcu ze Syriskeje z kuchinskim nožom na šiji a 72lětneho na hrudźi. 28lětny skućićel bě z Němskeje wupokazany. Loni w decembru chcyše wón dobrowólnje woteńć, njeje pak tole činił.
Prěnja sudniska poražka
Washington (dpa/SN). Sudnistwo w USA je prezidentej Donaldej Trumpej juristisku poražku wobradźiło. Sudnik w zwjazkowym staće Washington je pospyt republikana zadźeržał, prawo na staćanstwo USA přez porod w tutym kraju za wšelake skupiny wobmjezować. Wotpowědny wukaz Trumpa je „eklatantne ranjenje wustawy“, rjekny sudnik John C. Coughenour po informacijach medijow. Do toho běchu wjacore zwjazkowe kraje skóržbu přećiwo dekretej Trumpa zapodali, kiž bě wón bjezposrědnje po zapokazanju do zastojnstwa w Běłym domje we Washingtonje podpisał. Mjeztym je wón připowědźił, zo chcył so rozsudej sudnika juristisce spjećować. Fachowcy wočakuja, zo póńdźe pad přez wjacore instancy a zo dyrbi na kóncu najwyše sudnistwo USA rozsudźić.
Wustawa USA postaja, zo su wšitcy ludźo, kotřiž so w zjednoćenych statach narodźa, awtomatisce staćenjo kraja. Trump argumentuje, zo tole njepłaći, hdyž je mać dźěsća při porodźe ilegalnje abo jenož nachwilnje w USA.
To a tamne (24.01.25)
Cuzy muž we łožu je mějićela bydlenja w sewjerorynsko-westfalskim Iserlohnje překwapił. 50lětny podružnik njebě wjacory dny w bydlenju a 30lětneho čornje zdrasćeneho njeznateho we łožu wuhlada. Wón ćisny jeho z bydlenja a zawoła policiju. Jako zastojnicy přijědźechu, so wukopa, zo maja wukaz zajeća přećiwo 50lětnemu, dokelž njebě pokutu zapłaćił. Jeho dowjezechu do jastwa. Cuzy muž we łožu bě so mjeztym dawno zminył.
Kompletny 500 kilogramow ćežki pjenježny awtomat su njeznaći w Mainzu pokradnyli. Kaž policija zdźěli, běchu skućićeljo swětły dźeń wokoło 8 hodź. z ćežkej techniku přijěli a awtomat sobu wzali, štož je tež swój čas trało. Nimo toho wužiwachu małe nakładne awto za transport nastroja. Policija prosy swědkow, kotřiž su něšto podhladneho wobkedźbowali, so přizjewić.
W duchu rozswětlerstwa mytowali
Nowy woheń w Los Angelesu
Los Angeles (dpa/SN). Nowy lěsny woheń, kotryž so spěšnje rozpřestrěwa, je na juhu Kaliforniskeje tysacy ludźi wućěrił. Tak mjenowany „Hughes“-woheń je něhdźe 70 kilometrow sewjernje Los Angelesa wudyrił. Po informacijach wohnjoweje wobory su so płomjenja w běhu někotrych hodźin na płoninje 38 kwadratnych kilometrow wupřestrěli. W potrjechenej kónčinje namołwichu 30 000 ludźi, swoje domy wopušćić.
Huthi nětko zaso terorisća
Washington (dpa/SN). Prezident USA Donald Trump chce wot Irana podpěranu milicu Huthijow w Jemenje znowa jako wukrajnu terorowu organizaciju zastopnjować. Wón wopodstatni tole mjez druhim z dale trajacymi nadpadami milicy na wójsko USA a na wikowanske łódźe w Čerwjenym morju. Wo tym informowaše wozjewjenje Běłeho domu. Ze zastopnjowanjom jako terorowa organizacija su razne sankcije zwjazane. W Jemenje knježi wot lět 2014 wobydlerska wójna.
Muža w Gazy zatřělili
