Gosen-Neu Zittau (dpa/SN). 19lětny Němc je wčera připołdnju dwě wosobje na šuli w braniborskej gmejnje Gosen-Neu Zittau na juhowuchodźe Berlina morił. Jedyn wopor nadpada, 18lětna šulerka,­ běše po informacijach powěsćernje dpa bywša přećelka skućićela. Dalši wopor běše domownik šule, kotryž chcyše­ nadběhej zadźěwać. Policija je młodostneho krótko po njeskutku zajała. Wjace hač sto šulerjow a jich starši su so wječor před šulu zhromadźili a na woporaj­ njeskutka spominali. Prezidentka Braniborskeho krajneho sejma Ulrike Liedtke (SPD) je mordarstwo jako femicid pohódnoćiła.

Lěhwo migrantow nadpadnyli

Ceuta (dpa/SN). Demonstranća su lěhwo migrantow w španiskej eksklawje Ceuta w sewjernej Africe nadpadnyli a tam woheń­ zamiškrili. Woni žadachu sej hnydomny nawrót ćěkańcow do Marokka. Policisća su masiwnje zakročili. Do toho běchu demonstrowacy ze žiwi­dłami a wodu nakładowane awta Mjezyna­rodneho čerwjeneho křiža zadźeržeć spytali. Wjacore tysacy ćěkancow tuchwilu hišće w lěhwje přebywaja.

Po 45 lětach zawěsćenja wupłaćichu rentnarjam loni přerěznje 1 696 eurow

Berlin (dpa/SN/MiP). 1 195 eurow měsačneje renty su wuměnkarjo po wčera wušłej lětnej rozprawje Němskeje rentoweje zawěsćernje (DRV) w Němskej loni přerěznje přijimali, to je 41 eurow wjace hač lěto do toho. Žony maja w přerězku nimale 500 eurow mjenje renty hač mužojo. Wone dóstawaja měsačnje 994 eurow, mužojo 1 449 eurow. Tute ličby wšak su mało reprezentatiwne, dokelž su w nich tež ći zapřijeći, kotřiž su jenož skrótka rentowe zawěsćenje płaćili. Tutej skupinje přisłušeja na přikład ludźo, kotřiž su so zesamostatnili abo kiž buchu zastojnicy.

Bóle realistisku přehladku dóstanješ, wobhladaš-li sej přerěznu rentu po 35 lětach zawěsćenja. Zawěsćeni w tutej skupinje dóstachu loni přerěznje 1 336 eurow renty wob měsac, mužojo mějachu 1 573, žony pak jenož 1 074 eurow. Ludźo, kotřiž su po 45 lětach zawěsćenja do docpěća regularneje starobneje mjezy 67 lět bjez wotćahow na wuměnk šli, dóstachu loni přerěznje 1 696 eurow renty měsačnje.

Rathen (dpa/SN). Po ćežkim njewjedrje před štyrjomi njedźelemi w Sakskej Šwicy­ kołowokoło Rathena nětko z he­likopterom powalene zdónki štomow rumuja. To je jenička móžnosć, drjewo z ćežko přistupneje wokoliny jězora Amselsee a skalneho jewišća w Rathenje wottransportować, statny lěsny zawod Sachsenforst wčera zdźěli. Wulke lěsnistwowe mašiny tam zasadźować njemóža. Tuchwilu leći helikopter kóžde pjeć mjeńšinow z potrjecheneje kónčiny­ k wotkładowanišću.

Předstajenja na skalnym jewišću w Rathenje so nadal njewotměwaja. W lětušej hrajnej dobje planowane dźiwadłowe­ kruchi pak předstajeja na narunanskich­ městnosćach, mjez druhim­ na lěsnym jewišću w Biskopicach.

Podstupim (SN/MiR). Wustajeńca fotografijow z titulom „Cyle blisko. 99 objektow přichoda z Łužicy“ je tak wuspěšna, zo wostanje hišće hač do 28. septembra tohole lěta w Braniborskim minister­stwje za kulturu w Podstupimje přistupna. Jědnaće absolwentow a absolwentkow kaž tež studowacych šule za fotografiju Ostkreuz je so z prašenjom zaběrało, što je wobydlerjam mjez Błótami a Žitawu kótwica za přichod jich žiwjenskeho ruma. 99 Łužičanow powěda na fotografijach na zakładźe samowuzwolenych objektow wo swojim přichodźe, zdźěli ministerstwo za kulturu. Wustajeńca je w zhromadnym dźěle ze spěchowanskim towarstwom Braniborskeje Techniskeje uniwersity Choćebuz-Zły Komorow (BTU) nastała. Ministerka dr. Manja Schüle rjekny: „Wustajeńca zmóžnja dohlady z jednoho do druheho regiona. Wona pokazuje kachle, busowe zastanišćo, młyn na brunicy, kulku ze škleńcy, model lětadła – ale tež čołmarjow, zahrodkarki, wědomostnikow, dźěći kaž tež hišće pytacych. Wona rěči wo ludźoch, kotřiž we Łužicy bydla a ze swojim objektom swoje a stawizny regiona powědaja – awtentisce a direktnje.“