Němske předewzaća so lětsa zaso na ruskim hospodarskim forumje wobdźěla

Pětrohród (dpa/SN). Wot jutřišeho prosy ruski prezident Wladimir Putin na Pětrohródski mjezynarodny hospodarski forumje (SPIEF). Ruskeho nadpada na Ukrainu dla so w minjenych lětach němscy předewzaćeljo na nim oficialnje wobdźělili njejsu. Na lětušim 29. wudaću foruma pak chcedźa tam zaso prezentni być. „Runja druhim wulkim zapadnym narodam chcemy – nic naposledk hladajo na wokomik po móžnym přiměrje – hospodarski móst do Ruskeje zdźeržeć“, wuzběhny nawoda­ předsydstwa Němsko-ruskeje komory za wukrajne wikowanje Matthias Schepp w rozmołwje z němskej powěsćernju dpa. Hižo loni běchu so hospodarscy zastupjerjo z USA a Francoskeje na SPIEF wobdźělili.

Štóž tróšku na strowe zežiwjenje kedźbuje, sej zwjetša tež wudźěłki regionalnych producentow žiwidłow waži. Pola nich skerje wěš, kak so skót plahuje, hač na polach jěd pryskaja a kak so mloko předźěła. Mały kućik z regionalnymi wudźěłkami mjeztym we wjacorych wobchodach wuhladaš. Tež w nowym dworowym wobchodźe na Frenclec-Konjechtec statoku w Ralbicach tajke produkty poskićuja. Ale to nic jenož w kućiku, ale po cyłym wobchodźe. Wot pjekarskich słódnosćow přez zeleninu a kołbasu hač k marmeladam a brěčkam nadeńdźeš tam nimale bjezwuwzaćnje jenož twory, kotrež z bjezpo­srědneje wokoliny pochadźeja. Njeznaju w našej kónčinje žane druhe předawanišćo, kotrež je tak konsekwentnje regionalnje wusměrjene. Móhł sej derje předstajić, zo sej přichodnje něchtóžkuli nic jenož kěrchowa, ale tež noweho wobchoda dla do Ralbic dojědźe. Na kóždy pad je wjes z nim wo dalšu wosebitosć bohatša. Marian Wjeńka

Nic jenož Błótowsku serbsku drastu su mnozy wopytowarjo kónc tydźenja w Lubnjowje při nanajrjeńšim wjedrje na paralelnje so wotměwacymaj zarjadowanjomaj wobdźiwać móhli. Něhdźe 200 ludźi ze wšěch kónčin Němskeje běše w tradicio­nalnych drastach swojeho regiona na Němski dźeń drastow přichwatało a prezen­towaše je publikumej na najwšelakoriše wašnje na jewišću, na přikład z rejemi. Na Wikach tradicijow zeznajomnichu so hosćo nimo toho z regionalnym rjemjesłom a regionalnymi wudźěłkami kaž tež chłóšćenkami. Njedźelu dopołdnja woswjećichu wšitcy zhromadnje ekumenisku božu słužbu pod hołym njebjom na Lubnjowskej Róžowej zahrodźe. Foto: Michael Helbig

Drježdźany (SN). Sakska je swjedźensku tradiciju karnewala, póstnicow a zapusta na wuchodźe Němskeje do krajneje lisćiny imaterielneho kulturneho herbstwa přiwzała. We wčera wozjewjenej medijowej zdźělence ministerki za kulturu a turizm Barbary Klepsch (CDU) k tomu rěka: „Wuchodoněmski karnewal je wjace hač prosty nałožk. Je wuraz zhromadnosće a kreatiwity. Přez generacije su čestnohamtsce skutkowacy tutón wosebity kulturny podawk wobchowali a dale wuwiwali.“ Požadanje wo přiwzaće tradicije běchu wuchodoněmske wotnožki Zwjazka němskich karnewalow wudźěłali. W Durinskej a Braniborskej bu hižo do wotpowědnych lisćinow zapisana.

Spočatki wuchodoněmskeho karnewala sahaja hač do srjedźowěka wróćo a su wusko z křesćanskim póstnym časom zwjazane. Najstarši nałožk naspominacy historiski dokument z lěta 1391 chowaja w durinskim městačku Königsee. Dźensa pěstuje něhdźe 95 000 čłonow w dohromady 930 towarstwach w Braniborskej, Berlinje, Mecklenburgsko-Předpomorskej, Sakskej, Saksko-Anhaltskej a Durinskej karnewalistisku tradiciju.