Drježdźany (SN/MiP). Zarjadniske sudnistwo w Drježdźanach je Budyskemu wo­krjesej wčera dowolnosć sakskeje krajneje direkcije za wu- kaž tež nowotwar tak mjenowaneje Sprjewineje dróhi mjez Sprjejcami a Nowym Městom sćazało. Přećiwo planam tak mjenowaneho druheho twarskeho wotrězka je mjez druhim sakska krajna wotnožka Zwjazka za wobswět a přirodoškit (BUND) skoržiła. Podpěrowali su skóržbu lokalne woby­dlerske iniciatiwy a towarstwa kaž Nowoměšćanske towarstwo Předźernja, kotrež je tež z čłonom Zeleneje ligi, abo přirodoškitny zwjazk Němskeje (NABU) w Běłej Wodźe.

Jako nošer 30 milionow eurow droheho twarskeho projekta měješe Budyski wokrjes z wutwarom něhdźe 5,2 kilometraj dołheho wotrězka dróhi dwaj wulkej zaměraj: Sprěnja chcyše direktny a spěšny zwisk mjez industrijnym parkom Čorna­ Pumpa a milinarnju w Hamorje stworić, kotryž je za ćežki wobchad kmany. A zdruha měješe so z tym zdobom wobchadej wulkich nakładnych awtow přez Nowu Wjes, Sprjejcy a Nowe Město zadźěwać.

Dohromady 45 młodych fachowych dźěłaćerjow Zhorjelskeho wokrjesa w tak mjenowanych­ zelenych powołanjach je zawčerawšim w Zhorjelskim krajnoradnym zarjedźe swoje wuswědčenja přijimało. Šěsć wučomnikow swoje wukubłanje z jedynku zakónči. Absolwenća dźěłaja wotnětka jako plahowarjo skotu abo zwěrjatow, w krajinotwarje, zahrodnistwje abo rybarstwje. Krajny rada dr. Stephan Meyer (CDU) skedźbni w swojej narěči na wažnu rólu zelenych powołanjow za region: „W tutych powołanjach skutkowacy hladaja přirodu a resursy a skrućeja z tym kulturnu krajinu­ w našim Zhorjelskim wokrjesu.“ Foto: Krajnoradny zarjad Zhorjelc

Michael Kretschmer (CDU) změje wo­spjet priwatnu awdiencu pola bamža. Swoju prěnju awdiencu měješe sakski ministerski­ prezident, kotryž přisłuša ewangelskej cyrkwi, w lěće 2022 pola bamža Franciskusa. Temy tehdyšeje rozmołwy běchu wójna w Ukrainje, postu­powanje cyrkwje přećiwo znjewužiwanju dźěći a změna klimy. Přichodnu srjedu přijima jeho bamž Leo XIV. w Japoštołskim palasće Vatikana.

Ameriska hniłosć (Amerikanische Faulbrut) – bakterielna chorosć pčołkow – so we wokrjesu Dubja-Błóta rozpřestrěwa. Pjeć padow pčolaceje mrětwy je weterinarny zarjad wot spočatka junija we wo­krjesu zwěsćił. Wokoło gmejnow Königs Wusterhausen/Parsk, Schenkendorf/Šenkojce, Mittenwalde/Chudowina, Gallun/Gółuń, Bestensee/Bestwin­ a Zeesen su zawrjene pasmo zarjadowali.

Helsinki/Helsingfors (SN/MG). Federalistiska unija europskich narodow (FUEN) hotuje so na swój lětuši kongres. Tutón wotměje so wot jutřišeho w finskej stolicy Helsinki/Helsingfors. Z hosćićelom je lětsa ludowe zastupnistwo za zajimy finskich Šwedow z mjenom Folktinget. Mjeztym je to 70. kongres FUEN, a prěni raz wuhotuja jón w Helsinkach. Finska je kraj z dwěmaj hamtskimaj rěčomaj: finšćinu a šwedšćinu. Něhdźe pjeć procentow finskeje ludnosće rěči šwedsce. „Zhromadnosć šwedskeje mjeńšiny w Finskej je wusahowacy přikład za to, kak móhł so škit mjeńšinow radźić“, prezidentka FUEN Olivia Schubert w swojich witanskich słowach piše. Wot štwórtka hač do soboty chcedźa so zastupjerjo wjace hač 100 čłonskich zwjazkow FUEN wo aktualnych wužadanjach mjeńšinow wuměnjeć. Serbow reprezentuja mjez druhim předsyda Domowiny Dawid Statnik, hłowna jednaćelka třěšneho zwjazka Judit Šołćina a Hartmut Leipner, kotryž je zdobom městopředsyda Domowiny kaž tež FUEN. Serbske Nowiny rozprawjeja wo kongresu w ćišćanym wudaću a na Instagramje pod @serbske_nowiny.