Nadawki rozdawali
Drježdźany (dpa/SN). „Europasinfonija“ zwjazuje orchestry a chóraj z dwanaće europskich krajow. Tři jednotliwe dźěle sinfonije skomponuja młodźi komponisća z Pólskeje a Italskeje. Wotpowědny nadawk dóstanu Andrzej Ojcenasz, Damian Dziwenka a Francesco Darmanin, zdźěla Drježdźanscy sinfonikarjo, kotřiž su za projekt hłownje zamołwići.
Prapremjera wotměje so klětu w juniju. Orchestry a chóraj zahraja a zaspěwaja runočasnje z pomocu live-přenošowanja. Na Drježdźanskich wikach piska 62 smyčkarjow. Jewišćo tam je centrum předstajenja. Druzy hudźbnicy budu na wobrazowkach widźeć. Na wurunanju latencow, potajkim dlijenjow signalow, kotrež wulke distancy wuskutkuja, so hišće dźěła.
Prěnje słyšenje za móžny zakaz AfD
Erfurt (dpa/SN). Měła so politika wo to prócować stronu AfD zakazać abo tola nic? Prěni raz su jurisća, eksperća a prominentni tute prašenje w němskim parlamenće při zjawnym słyšenju rozjimali. Tež entertainer Hape Kerkeling bě z hosćom słyšenja. Po swojich słowach tam jako eksperta za wustawowe prawo njewustupowaše, ale jako potomnik wopora nacionalsocializma. „Čuju, zo je naša demokratija wohrožena“, Kerkeling swój wustup w krajnym sejmje Durinskeje wopodstatni.
Wo słyšenje bě so frakcija Lěwicy prócowała. Wona chce docpěć, zo durinske krajne knježerstwo jednanje wo zakazu AfD na zwjazkowej runinje podpěruje.
Na słyšenju porěči mjez druhim tež něhdyši prezident wustawoweho škita Hans Georg-Maaßen. Wón so přećiwo zakazej wupraja. Jurist a prawiznik AfD Christian Conrad rjekny, zo je jednanje wo zakazu přećiwo wustawje, hdyž strona, wo kotrejž jednaja, zakładnemu zakonjej scyła njeznapřećiwja. Wuslědk słyšenje měło njeje.
Płaćizny raz niše a raz wyše
Rabat za tankowanje płaćiwy – Zwjazkowy tiket klětu znowa dróši
Berlin/Mnichow (dpa/SN). Rabat za tankowanje je na mnohich městnach po cyłej Němskej niše płaćizny za ćěriwa wuskutkował. Hižo wokoło połnocy běchu bencin a diesel wo wjele tuńšo. Po portalu Tankerkönig lutowachu kupcy w hodźinje wot 23.41 do 0.41 hodź. něhdźe 10 centow na liter. Tež dźensa zahe rano bě diferenca něhdźe tak wulka, potajkim bě ćěriwo něhdźe 10 centow tuńše hač wčera w samsnym času.
Mnohe tankownje předawachu superbencin družiny E10 za mjenje hač euraj, kaž Powšitkowny němski awtomobilowy klub ADAC zdźěla. Tu pak je regionalnych rozdźělow. W Mnichowje, Stuttgarće abo Lipsku zwěsćichu mnohich tunich poskitkow. W Berlinje mějachu jich dosć, w Hamburgu pak scyła žane tajke poskitki registrowali njesu. Přerězna płaćizna pola Tankerkönig pak bě jasnje nad euromaj.
Wopačny signal
To a tamne (01.10.26)
Swoju słužbnu bróń wužiwać dyrbješe wčera policist w Drježdźanskim měšćanskim dźělu Prohlis. Hromadźe z kolegami chcyše 51lětneho muža w zwisku ze seksualnym deliktom w jeho bydlenju zajeć. Tón pak chcyše so z nožom w ruce zajeću spjećować. Wutřěle policista podhladneho ćežko zranichu. Kriminalna policija je přepytowanja podawka zahajiła. Při tym tež pruwuje, hač bě wužiwanje słužbneje brónje woprawnjene.
7 000 lět stare sydlišćo z młodokamjentneje doby su archeologojo na twarnišću zakładnošulskeho kompleksa w Lipsku wotkryli. Wosebje jónkrótny objekt je rownišćo ze skeletom pohrjebaneho. Zemrěty bu w čapnjenej poziciji pochowany, kotraž je za dobu typiska. Row je najstarši, kotryž su hdy w Lipšćanskej wokolinje namakali, zdźěla Sakski krajny zarjad za archeologiju.
Wo kongresu w Helsinkach
Zwotkel pjenjezy brać? A kak dwurěčnosć w Finskej funguje?
To woprawdźe zajimawe na kongresach, hłownych zhromadźiznach a posedźenjach so poprawom stawa, hdyž je sydarnja prózdna. Potom maja delegatki a delegaća; wobdźělnicy a čłonojo mjenujcy chwile so wuměnjeć a swoje syće pěstować. Networking so to mjenuje. Tež w Helsinkach to hinak njebě. Móžu pak rjec, zo bě 70. kongres Federalistiskeje unije europskich narodow (FUEN) tež zajimawy, hdyž běchu stólcy žurle hotela Clarion dosć derje wobsadźene.
Program, kotryž běchu šwedscy Finojo zhromadnje z prezidijom a generalnym sekretariatom FUEN na nohi stajili, bě chětro połny, přiwšěm pak wotměnjawy a jenož druhdy tróšku wostudły. Derje, přiznaju, zo sydam jako žurnalist stajnje w poslednim rynku a čakam, zo je skónčnje čas k wobjedu abo wječeri.
Žorćik.
Zawjedu elektroniske puta
Drježdźany (SN). Sakski kabinet je dźensa statnemu zrěčenju zwjazkowych krajow wo wužiwanju elektroniskich putow přihłosował. Přihłosowanje krajow je prawniski zakład za noworjadowanje zwjazkoweho zakonja za škit přećiwo namocy. Elektroniske puta maja w přichodźe pomhać, wohroženych ludźi před domjacej namocu škitać. Klětu w juliju maja swójbne sudnistwa dowolnosć dóstać, zo elektroniske wobstražowanje namócnych skućićelow wukazaja.
Warnowanski system zawjedli
Schönefeld (dpa/SN). Zwjazkowy wobchadny minister Steffen Bilger (CDU) a jeho braniborski kolega w zastojnstwje Robert Crumbach (SPD) staj wčera na lětanišću Berlin Braniborska (BER) dźěławosć noweho systema k spóznaću trutow oficialnje zahajiłoj. Bilger skedźbni na dale a stupace ličby wohrožowanjow němskich lětanišćow přez truty a praji, zo chce Zwjazk spěšnje tež na dalšich mjezynarodnych lětanišćach w kraju tajki system instalować.
Wo reformje so dojednali
Ministerski prezident Sewjerorynsko-Westfalskeje Hendrik Wüst ...
Mjez wuchodom a zapadom nadal wulke rozdźěle
Drježdźany/Berlin (dpa/SN). 36 lět po zjednoćenju Němskeje su rozdźěle mzdow a zamóženstwow mjez zapadom a wuchodom přeco hišće signifikantne. Po aktualnym wuhódnoćenju Němskeho zwjazka dźěłarnistwow (DGB) zasłuža dźěławi na wuchodźe w přerězku 12 415 eurow wob lěto mjenje hač na zapadźe. „Pod smužku dźěłaja ludźo we wuchodnej Němskej w přirunanju ze zapadnej Němskej w přerězku nimale 72 dnjow zadarmo“, předsydka sakskeho DGB Daniela Kolbe wutoru w interviewje ze Sakskimi Nowinami podšmórny. Wona žada sej tohodla wjace tarifowych zawjazkow a rjadowanja tarifow za zjawne nadawki we wuchodnych zwjazkowych krajach.
Po informacijach krajneho statistiskeho zarjada ma w Sakskej 42 procentow dźěławych zrěčenje, kotrež je na tarif wjazane. To je po cyłym zwjazku najmjenje. Sakscy dźěławi z dźěłowym zrěčenjom po tarifje maja wob lěto přerěznje něhdźe 13 603 eurow wyšu mzdu hač dźěławi, kotřiž so po tarifje njepłaća. „To je hoberski rozdźěl“, Kolbe wuzběhnje.
