Choćebuz (NC/KP). Lětušu delnjoserbsku Schadowanku su zašłu sobotu na nowym městnje, mjenujcy w Choćebuskim Gladhouse, a z nowo wuhotowanym programom woswjećili. Hižo popołdnju běchu zamołwići wšelke aktiwity poskićili, na přikład wodźenje po měsće, serbsko-němski program krótkofilmow a diskusije wo domiznje a kumštnej inteligency. Wječorny program zahaji chór delnjoserbskeho gymnazija pod nawodom Geralda Šejna. Spěw „Ancycka šarparjowa“ sej zhromadnje z publikumom za­spěwachu. Po tym prošeše Michael Apel na žurli do rejki. Na foyeru spěwachu čłonki a čłonojo Spiwneje kupki z přewodom Mareka Slodički na akordeonje delnjo- a hornjoserbske kaž tež pólske, słowakske a ukrainske ludowe spěwy. Jedyn z wjerškow wječora bě bjezdwěla wustup Błośańskich gitarow na žurli. Hudźbnicy zaspě­wachu někotryžkuli znaty němski spěw, kotryž běchu do delnjoserbšćiny přełožili. Składnostnje schadowanki běchu spěwaj „Lubše luźe, witajśo“ a „Ty, Łužyca Dolna“ do swojeho repertoira přewzali.