Drježdźany (dpa/SN). Dobrych połdra lět po tym zo bě so Caroliny móst w Drježdźanach sypnył, su štyri planowanske běrowy swoje naćiski za nowotwar ­mosta předstajili. Woni prezentowachu swoje koncepty gremijej, kiž bě měšćanska rada za to do žiwjenja zwołała, zo by proces přewodźał. Wo tym informuje ­zarjadnistwo sakskeje stolicy.

Wšě štyri wizualizacije su po swojich namjetach za móst samy, ale tež za při­brjóh Łobja blisko mosta jara rozdźělne. Raz su łuki pod mostom bóle w fokusu, raz mjenje. Jedyn z namjetow je skerje skromny, druhe wopřijimaja elementy kaž balkony abo wosebite koncepty wuswětlenja. Jedyn z planowanskich běrowow namjetuje galeriju nad kóncom mosta, ławki a park za skatowanje na nowoměšćanskim­ boku mosta.

Planowanskim běrowam běchu šěsć měsacow časa dali, swoje namjety zdźěłać. Měšćanska rada bě wažne faktory předpisała. Tak ma nowotwar štyri jězdnje za awta měć, funkcionalny być a so přiwšěm do wobraza města integrować. Nimo toho žadaja sej jenički stołp we Łobju. Techniske naroki: Móst ma robustny być, dołho stać a z mało hladanskimi dźěłami wuńć.

Drježdźany (dpa/SN). Sakski krajny sejm stanje so na wjacore lěta z twarnišćom. Kaž zdźěla statny zawod Sakski management imobilijow a twarow (SIB), chcedźa w juniju z tym započeć twarnišćo přihotować. W druhej połojcy lěta chcedźa twarsku jamu za přitwar wuryć a druhe dźěła w spódku wukonjeć. Krajny sejm bě wčera wo tym informował. Po podaću SIB płaći přitwar 73,6 milionow eurow. Za tak mjenowany kubus na dworje sejma planuja wudawki 38,7 milionow eurow. Wobě twarjeni chcedźa w běhu štyrjoch lět dotwarić. Hakle potom móža ­započinać stare twarjenje sejma renowěrować. Zapósłancy dyrbja mjenujcy najprjedy do běrowow w nowymaj twa­rjenjomaj přećahnyć. SIB bě běrowej ­architekta krajneho sejma Petera Kulkeho nadawk za planowanje saněrowanja a přitwara w lěće 2019 dał. Po jeho smjerći 2024 je jeho dźowka Katrin Leers-Kulka projekt přewzała. Něhdźe 70 metrow dołhi přitwar nastanje na swobodnej płoninje mjez hotelom Maritim a Łobjom. Z tunlom pod zemju ­chcedźa twarjenje z hižo wobstejacym kompleksom zwjazać.

Zasudźena lěwicarska ekstremistka Lina E. smě dočasnje jastwo wopušćić. Zwjazkowe sudnistwo je skóržbu generalneho zwjazkoweho rěčnika přećiwo wusadźenju jeje zbytneho chłostanja wotpoka­zało. W Kasselu rodźena a na Wyšim ­krajnym sudnistwje w Drježdźanach zasudźena Lina E. je so swojeje prjedawšeje zwólniwosće k namocy wotrjekła, je so w jatbje wotpowědnje zadźeržała a ma „přihódnu prognozu“ do přichoda, piše kriminalno-psychologiska wěcywustojna w swojim posudku.

Wopřijeće „Lackaffe“, z kotrymž běše pisar­ w swojim Facebook-komentarje zwjazkoweho kanclera Friedricha Merza (CDU) wopisał, je statne rěčnistwo w Heilbronnje jako „skřiwdźenje wosoby poli­tiskeho žiwjenja“ pohódnoćiło. Přećiwo chłostanskemu přikazej smě skućićel nětko znapřećiwjenje zapodać.

Verden (dpa/SN). Něhdyšu teroristku RAF Danielu Klette su na krajnym sudnistwje we Verdenje k třinaće lětam ­jastwa zasudźili. Swoju pokutu dyrbi ćežkeho rubježnistwa, přeńdźenjow přećiwo zakonjej za brónje a druhich nje­skutkow dla wotsedźeć. Sudnistwo bě zwěsćiło, zo bě Klette zhromadnje z Burkhardom Garwegom a Ernstom Volkerom Staubom transporter za pjenjezy a wjacore kupnicy nadpadnyła.

Partnerojo so schadźowali

Poznań (dpa/SN). Zastupjerjo Braniborskeje, Sakskeje, Mecklenburgsko-Předpomorskeje a Berlina zetkachu so dźensa ze zastupjerjemi pólskich wójwodstwow Wielkopolskie, Lubuskie, Zachodniopomorskie a Dolnośląskie. Zhromadnje chcedźa wo tym wuradźować, kak měli ze cyberowymi atakami a sabotažu wobchadźeć. Nimo toho steja tež infrastrukturne temy na agendźe. Tak mjenowane partnerstwo Wódra wobsteji hižo dźewjeć lět. Tuchwilu předsydari Braniborska zwjazkej.

Mało ludźi ma jara wjele