Berlin (dpa/SN). Zwjazkowy kabinet je naćisk za reformu dawkow zwjazkoweho financneho ministra Larsa Klingbeila wčera schwalił. Nowy zakoń ma wot lěta 2028 předewšěm ludźi z małymi a srěnimi dochodami kaž tež swójby z dźěćimi financielnje wolóžić. Cyłkowna suma wolóženjow wučinja lětnje něhdźe dźesać miliardow eurow.

Klingbeil sam njeběše na kabinetnym posedźenju přitomny. Lětadło, z kotrymž chcyše wot wjerška G20 z USA do Němskeje přilećeć, měješe škodu, tak zo termin dodźeržeć njemóžeše. Wón pak do posedźenja w němskich medijach na to skedźbni, zo změja „swójby z dźěćimi z reformu wjace hač 600 eurow wob lěto wjace w domjacej kasy hač dźensa“. W naćisku předwidźa mjez druhim wyšu zakładnu bjezdawkowu sumu dochodow we wobjimje 70 600 eurow. Tež dźěćacy pjenjez a pawšalu za powołanske wudawki chce zwjazkowe knježerstwo zwyšić. Financować chce naprawy mjez druhim z pomocu nišeje mjezy tak mjenowaneho „dawka za bohatych“.

Emeritowany biskop Heinrich Timmerevers dale dušepastyrsce skutkuje

Drježdźany/Njebjelčicy (StŠ/SN). Kaž je mjeztym emeritowany biskop Drježdźansko-Mišnjanskeho biskopstwa Heinrich Timmerevers wčera připowědźił, steji najebać swojeho wotstupa za dušepastyrske nadawki dale k dispoziciji. Kaž planowane 74lětny młodostnym w Njebjelčicach njedźelu, 20. septembra, sakrament swjateho firmowanja spožči. Tole je nowinski rěčnik biskopstwa dźensa dopołdnja na naprašowanje Serbskich Nowin wobkrućił.

Wčera popołdnju smój sej do rěčneho hnězda kursa Domoj do Wulkich Zdźar dojěłoj. W tamnišim Krabatowym domje wuhotowachu wobdźělnicy kursa lěćny swjedźeń. Rjenje přihotowana rumnosć naju witaše. Spočatnje běchmoj skep­tiskej, wšako su měnjenja wo rěčnym kursu kontrowersne. Buchmoj pak pozitiwnje překwapjenej. Kursisća so předstajichu a zaspěwachu „Wjesele dźensa“ nimale z hłowy. Program pokročowaše z před­noškom Doris Kasperec. Wona bě so Woje­rowsku drastu woblekła a w njej chětro sebjewědomje wustupowaše. Doris Kasperec předstaji hosćom kóždy dźěl drasty w dobrej serbšćinje. Tež dalša „domojnica“ namaj na prašenja serbsce wotmołwješe – hišće nic perfektnje a ryzy serbsce, ale wolu serbsce rěčeć jasnje spóznachmoj. Tutej a dalše přikłady namaj pokazachu, zo su tam definitiwnje wobdźělnicy, kotřiž maja wulku motiwaciju serbsce nawuknyć. Celina Knopec, Hana Nukec

60 dnjow po Dunaju płuwał – wot jeho žórła w badensko-württembergskim Donaueschingenje hač k zaliwej do Čorneho morja – je Drježdźanski ekstrem­ny płuwar Joseph Heß. Za­wčerawšim zakónči swoju poslednju etapu w rumunskim měsće Sulina. Na swojej turje přez dohromady dźesać krajow je jeho team přewodźał, kotryž wuprawu sportowca jenož z kameru njedokumentowaše, ale tež wodowe proby nazběra. Z datami chcedźa kartu zanjerodźenja Dunaja z mikroplastikom zhotowić.

20 000 do 25 000 eurami zamołwići w naro­dnym parku Sakska Šwica kóžde lěto za wotstronjenje škodow wudawaja, kotrež wopytowarjo zawostajeja. K tomu słušeja grafitije na skaliskach, skónco­wane abo z nalěpkami polěpjene pućniki abo „rězbarstwa“ dla wobškodźene štomy.