Erfurt (dpa/SN). Zwjazkowe předsydstwo strony BSW je durinskemu ministerskemu prezidentej Marijej Voigtej (CDU) kazało, swoje zastojnstwo złožić. Nimo toho bě zwjazkowe předsydstwo krajnemu zwjazkej BSW w Durinskej přikazało, zo njeměł tutón Voigta hižo dale podpěrać. Pječa je zwjazkowe předsydstwo tole jednohłósnje wobzamknyło. Załožerka BSW Sahra Wagenknecht a wjednistwo strony so hižo dlěje z durinskim zwjazkom wadźa, wšako BSW w Durinskej zhromadnje z CDU a SPD knježi. Swoje žadanja wopodstatnja zwjazkowe předsydstwo z tym, zo je Techniska uniwersita w Kamjenicy Voigtej doktorski titul woteznała. Jemu wumjetuja, zo bě špatnje dźěłał. Durinski BSW pak nochce, zo koalicija so kónči. Čłonkam a čłonam w Durinskej piše wjednistwo strony: „BSW njesmě wjetšinu za muža zaručeć, kotryž swójske zajimy nad tymi kraja staja. Wočakujemy tuž, zo frakcija BSW w durinskim krajnym sejmje Voigtej swoju podpěru wupowědźi a njestronskeho ministerskeho prezidenta podpěruje.“

Po cyłym kraju hroža buram suchoty a horcoty dla financielne ćeže

Berlin (dpa/SN). Smalace słónco a ty­dźenje trajaca suchota so w někotrych dźělach Němskeje w zwisku ze žnjemi zahu­bnje wuskutkujetej, měnja za­stupjerjo branše. Wot srjedź junija su tohodla ně­hdźe tři miliony tonow žita a rě­­pi­ka zhubi­li, zdźěla Zwjazk němskich Raiffeisen-zawodow, zastupowacy 1 600 zawodow, kiž z agrarnymi tworami wi­kuja abo tute předźěłuja. Na juhu Němskeje je situacija wosebje napjata. Nimo toho je we wja­corych rěkach tak mało wody, zo nje­móža žito po nich transportować.

Tež Zwjazk němskich burow připowědźi špatniše žně abo samo dospołny wupad žnjow. „Žně žita, wosebje pšeńcy, a rěpika drje budu pod přerězkom“, rjekny prezident burow Joachim Rukwied Redakciskej syći Němska (RND). „Nastupajo nazymske kultury je dźeń a jasnišo, zo dyrbimy so na dočasne žně nastajić“, Rukwied dale zdźěli. Straty wočakuja pola běrnow, zeleniny a cokoroweje rěpy, ale tež pola kukuricy a sojabunow. „W južnych dźělach Němskeje móhli cyłe žně wupadnyć.“

Institut za němske hospodarstwo (IW) je wuličił, w kotrej měrje su wuchodne zwjazkowe kraje wot připućowanja wotwisne. W studiji warnuje IW mjez druhim před negatiwnymi wuskutkami nawróta migrantow z wuchodneje Europy do jich domizny.

Berlin (dpa/SN). W swojej nowej krótkostudiji skedźbnjeja fachowcy IW na wažnu rólu připućowarjow na dźěłowych wikach. W dobje mjez 2023 a 2025 je něhdźe 141 000 přistajenych z němskim staćanstwom wotpućowało – porno tomu stupaše ličba dźěławych bjez němskeho pasa w tutej dobje jenož wo 90 000. IW je statistiki wšitkich wuchodoněmskich krajow kaž tež Berlina wuhódnoćił.

Fachowcy wuzběhuja, zo budźe ličba dźěławych přichodne lěta dale spadować – mnohich wotchadow do renty, ale tež migrantow dla, kotřiž so do swojeje domizny nawróća. Wot lěta 2023 do 2025 je we wuchodnych krajach cyłkowna suma dźěławych němskich staćanow wo 2,5 procentow, suma wšitkich dźěławych pak jenož wo 0,8 procent spadnyła. Porno tomu je suma wšitkich dźěławych po cyłej Němskej lochce wo 0,2 procentaj stupała, zdźěli institut.

Mandźelskeho a awto runočasnje je 90lětna w Mannheimje zhubiła. Dokelž ani muža ani awto hižo njenańdźe, prošeše staruška policiju wo pomoc. 89lětny bě swoju žonu před lěkarskej praksu wotsadźił a po tym za parkowanišćom pytał. Po 45 mjeńšinach pytanja běštaj mandźelskaj zaso zjednoćenaj. Muž bě mjenujcy sam zabył, hdźe bě awto wotstajił a so w starym měsće Mannheima zaběžał.

Štóž tuchwilu w italskich městach přebywa, tón tam přewjele njewuhlada. Wobchody, kofejownje a dalše posłužby su zawrjene. W awgusće sej Italčenjo mjenujcy tradicionalnje k morju abo do dowola wuleća. Wosebje wokoło 15. awgusta, potajkim na Marije donjebjes­wzaća, italsce Ferragosto, nichtó njedźěła. Za to su pobrjohi połne ludźi, kiž tam zhromadnje ze swójbnymi swjeća.