Dohromady 10 000 eurow za spěšnu humanitarnu pomoc je němski pomocny medikamentowy skutk „action medeor“ hladajo na ćežke zemjerženje Kolumbiskej přewostajił. Hižo dlěje hač 15 lět je pomocny skutk, kotryž ma swoje sydło w sewjerorynsko-westfalskim Tönisvorsće, ze swójskimi humanitarnymi projektami w regionje zemjerženja aktiwny.

Ze swojim protestom su fanojo filmow wo Harryju Potteru docpěli, zo je zamołwite předewzaće planowany milinowy zwisk mjez Wulkej Britaniskej a Irskej přepołožiło. Poprawom měješe tak mjenowany Greenlink-Interkonnektor přez ležownosć wjesć, na kotrejž su w filmje Dobbyja pohrjebali. Tónle dušny kubołćik pak je mjez přiwisnikami jara woblubowany. Njepřestajnych telefoniskich próstwow dla su čaru za kabl na kóncu přeplanowali.

Castel Gandolfo (B/SN). Na ležownosći bamžowskeje ekologiskeje institucije Borgo Laudato si’ wotmě so w přitomnosći bamža Leja XIV. a sobudźěłaćerjow vatikanskeje kurije wosebity koncert z modlitwami wo měr. Wustupiłoj staj swěto­znaty tenor Andrea Bocelli a w nošer­stwje jeho załožby chór dźěći a młodo­stnych z wjacorych narodow swěta.

Interkulturny tydźeń

Lipsk (B/SN). Lětuši cyłoněmski interkulturny tydźeń wotewru 27. septembra z ekumeniskimi kemšemi w Lipšćanskej Tomašowej cyrkwi. Přizamknje so jewišćowy program na dworje Božeho domu. Ewangelska a katolska cyrkej kaž tež ortodoksna biskopska konferenca namołwjeja k lubosći k blišemu kaž tež k tomu, spřećiwjeć so towaršnostnemu pačenju a diskriminaciji.

Spěchowanje projektow

Lipsk (dpa/SN). Po nadpadźe z trutomaj su na Lipšćanskim lětanišću radarowy system za škit před trutami zarjadowali. Techniku su na wopytowarskej platformje bywšeje wěže instalowali. Rěčnik zwjazkoweje policije zdźěli na naprašowanje powěsćernje dpa, zo nochcedźa z taktiskich přičin detaile připrawy wozjewić. Po informacijach powěsćoweho portala Tag24 je připrawa radarny system echoShield, kotryž móže so bližace truty we wjetšich distancach wuskušować a jich pohiby w powětře sćěhować.

W hotelu randalěrował

Freiberg/Lipsk (SN). Hakle před šěsć tydźenjemi je Philipp Preißler (njestronjan) zastojnstwo wyšeho měšćanosty w Freibergu nastupił. Po rozprawje sakskich regionalnych medijow je 41lětny minjeny štwórtk w swojim dowolu w Lipšćanskim hotelu randalěrował a mjez druhim wěcy z wokna mjetał. Na to su policiju na pomoc wołali. Dale je so aktiwnje zajeću spjećował. Hač je skućićel pod wliwom wopojadłow stał, dotal znate njeje.

Powodźenja na Filipinach