Lěwica kritizuje naprawy koalicije
Berlin (dpa/SN). Z raznej kritiku je Lěwica na připowědźene naprawy knježerstwa w boju přećiwo wysokim płaćiznam ćěriwa reagowała. Znižić dawk na energiju je na dobro wolijowych koncernow, rjekny předsydka frakcije Lěwicy Heidi Reichinnek w Berlinje. A tak mjenowany krizowy bonus je wotwisny wot dobreje wole dźěłodawarja a rentnarjam, studowacym a bjezdźěłnym scyła ničo njepřinjese.
„Ludźo w našim kraju njewědźa sej hižo žaneje rady a knježerstwo znowa pokazuje, zo nochce abo njeje kmane, rozrisanje namakać“, Reichinnek měni. Zo sej wot bohatych a dobyćerjow krizy wjace nježadaja ma wona za „historiske zaprajenje“. Z pjenjezami móhli energijowy krizowy fonds natwarić.
Lawrow w Chinje wuradźuje
Peking (dpa/SN). Ruski wonkowny minister Sergej Lawrow je do chinskeje stolicy Pekinga dolećał, zo by hladajo na wójnski konflikt na Bliskim wuchodźe zhromadne dźěło z Chinu pohłubšił. Po informacijach wonkowneho ministerstwa w Moskwje je chinski wonkowny minister Wang Yi dnjowemu porjadej přihłosował. Po tym chcetaj ministraj wo połoženju we wójnje Ruskeje přećiwo Ukrainje wuradźować a najnowše wuwiće na Bliskim wuchodźe wuhódnoćić. Hłowny zaměr je po słowach Lawrowa, stejišći Ruskeje a Chiny wothłosować a zhromadnje postupować.
W Chinje su mjeztym zastupjerjow dalšich krajow witali, kiž su wot wójny USA přećiwo Iranej potrjechene.
Libanon a Israel w rozmołwje
Klingbeil za spěšnu pomoc
Naprawy knježerstwa za tuńši bencin móhli wot meje skutkowne być
Berlin (dpa/SN). Zwjazkowy financny minister Lars Klingbeil (SPD) chce připowědźene zniženje dawkow na dobro šoferow „tak spěšnje kaž móžno“ zwoprawdźić. Tole bě wón sobudźěłaćerjam swojeho ministerstwa přikazał, rjekny Klingbeil nowinarjam w Berlinje. „Wuchadźam z toho, zo druhe wobdźělene ministerstwa a kanclerski zarjad to runje tak činja.“ Na kóncu rozsudźi wo tym zwjazkowy sejm. „Njezhubimy žadyn čas. Hdy by po mni šło, móhli to najpozdźišo spočatk meje wobzamknyć.“
Nawodźa knježerstwoweje koalicije su wobzamknyli, dawk na diesel a bencin wo 17 centow na liter znižić, wobmjezowane na dwaj měsacaj. Dźěłodawarjam je nimo toho móžno, sobudźěłaćerjam bjezdawkowu pawšalu tysac eurow wupłaćić. Z tym reaguje zwjazk CDU/CSU a SPD na raznje stupace płaćizny zemskeho wolija wójny USA přećiwo Iranej dla.
Kapka na horcy kamjeń
Mjenje škody njewjedrow dla
Lipsk/Berlin (dpa/SN). Njewjedra su loni w Swobodnym staće Sakskej na jězdźidłach škody we wobjimje 23 milionow eurow zawostajili. Tole zdźěla Zwjazk zawěsćernjow Němskeje. Wichor, krupy a błyski su 2025 něhdźe 6 000 jězdźidłow w Sakskej wobškodźili, to je mjenje hač w lěće 2024. Hłowna přičina: Je poměrnje mało njewjedrow było. Lěta 2024 běchu njewjedra něhdźe 10 000 awtow wobškodźili a škody we wobjimje 32 milionow eurow zawostajili.
„Zawěsćernje su přerěznje 3 700 eurow za kóždu přizjewjenu škodu wupłaćili“, zdźěli hłowny jednaćel zwjazka zawěsćernjow Jörg Asmussen. Měrne lěto pak njerěka, zo strachi njehroža: Jednotliwe njewjedro móže w běhu něšto hodźin masiwne škody zawinić.
Tež po wšej Němskej su škody njewjedrow dla woteběrali. Tak su zawěsćernje ludźom cyłkownje 650 milionow eurow wupłaćili. Lěta 2024 dyrbjachu za to 1,2 miliardźe eurow nałožić. W cyłoněmskich ličbach su pak tež škody přez wulku wodu zapřijate.
Po njewjedrje měli škodowani zawěsćernju spěšnje informować.
To a tamne (14.04.26)
50 000 eurow w plyšowym bariku namakała je nižozemska policija w póstowym centrumje na lětanišću Aachen-Maastricht. Njewšědne šowy a druhe spodźiwnosće su zastojnikow pohnuli, sej posyłku bliže wobhladać. Při wotewrjenju namakachu fałdowane bankowki 50 eurow, cyłkownje 50 000 eurow. Nětko pytaja za adresatom. Pjenjezy su sćazali.
Při demonstraciji za w pěsku tčacu wjelrybu w zaliwje kupy Poel w Baltiskim morju je k rozestajenjam z policiju dóšło. Wjacori demonstranća běchu přez płót zalězli, na čož jich policisća wróćo pósłachu. Tež nakładnej awće dyrbještej pod dohladom policije kupu wopušćić. Minjene dny běchu demonstranća wospjet spytali, so k wjelrybje předrěć. Zwěrjo je dźeń a słabše. Přichodny čas drje zahinje. Dalša pomoc nima hižo zmysła, fachowcy měnja.
Poselstwa Hioba w modernym času předstajiła
Budyšin (CS/SN). Hač z Ukrainy, z Irana abo z kanclerskeho zarjada – wšědnje docpěwaja nas tak mjenowane Hiobske powěsće. Ale štó běše poprawom Hiob, a što praji nam stawizna wo nim dźensa? Spisowaćelka a publicistka Ines Geipel přednošowaše minjeny pjatk w Budyskej Pětrowej cyrkwi wo tutej temje we wobłuku ,,Budyskich narěčow“ pod hesłom ,,Ćahanje mjezow – konflikt, resursa abo labor? Situacija demokratije“.
37 razow křižowany
Manila (B/SN). Ćichi pjatk ćahnu ludźo šwikajo so po dróhach filipinskich městow. Lětsa je so we wsy blisko Manile Ruben Enaje 37. a zdobom posledni raz z ćernjowej krónu a prawymi hozdźemi křižować dał. We wosomdźesatych lětach bě wón z wysokeho twara padnył a so ćežko zranił. Tehdy wón slubi w padźe wustrowjenja so křižować dać. Cyrkej tajke křižowanje wotpokazuje.
Z prezidentomaj telefonował
Vatikan (B/SN) Ćichi pjatk rano je bamž Leo XIV. z israelskim a ukrainskim prezidentom telefonował. Israelskeho prezidenta Isaaca Herzoga wón prošeše, w diplomatiskim dialogu ćežke konflikty rozrisać, zo by so sprawny a trajny měr na Bliskim wuchodźe docpěł. Z ukrainskim prezidentom Wolodymyrom Zelenskym jednaše bamž wo humanitarnej pomocy a wo pušćenju jatych.
Wopyt w Španiskej
Kuba chce wojować
Havanna (dpa/SN). Prezident Kuby Miguel Díaz-Canel je USA před tym warnował, konflikt z krajom wojersce přiwótřić. „Jeli so to stanje, wojujemy, budźemy so zakitować a jeli dyrbimy wumrěć, to wumrjemy“, rjekny wón sćelakej NBC News. „Nochcemy wójnu“, rjekny Díaz-Canel a zwurazni swoju zwólniwosć k rozmołwam. Knježerstwo USA je swoje naprawy přećiwo Kubje přiwótřiło a mjez druhim mórsku blokadu wukazało.
Drogowej čołmaj zničenej
Washington (dpa/SN). Wójsko USA je při nadpadźe na čołmaj pozdatnych pašowarjow drogow we wuchodnym Pacifiku pjećoch muži moriło. Čołmaj běštej dźěl kartela wikowarjow drogow, zdźěli regionalne komando wójska USA. Jedyn z muži na čołmach je nadpad přežiwił. Na přikaz prezidenta USA Donalda Trumpa marina USA wot lońšeje nazymy čołmy nadběhuje, kotrež pječa drogi do USA transportuja. Ataki w mjezynarodnych mórskich kónčinach su dwělomne.
Weidel a Chrupalla nastupitaj
