Dalše chorownje zawru
Podstupim (dpa/SN). Strowotniski minister Braniborskeje, Rene Wilke (SPD) měni, zo je dalše zawrjenje wotdźělow w chorownjach w zwisku z reformu chorownjow móžne a zdźěla trěbne. Zaměr reformy je, kwalitu lěkarskeho zastaranja dołhodobnje zawěsćić a kóšty znižić. W Podstupimje matej so w klinice Ernst von Bergmann ortopediska a žiłowa chirurgija zawrěć, w chorowni swj. Józefa pak zawru neurologiju, gynekologiju a porodnu pomoc. Přičina toho je reforma chorownje a falowacy personal.
Wjacore sta ludźi su w Podstupimje přećiwo zawrjenju wotdźělow w chorownjach a přećiwo skrótšenjam protestowali. Wilke apeluje, zo dyrbi so zastaranje pacientow tež po změnach dale zaručeć. Dołhodobnje dyrbja wšitke stejnišća chorownjow zachowane wostać, zdźěla pak změja nowe nadawki. Tež zakładne a nuzowe zastaranje ma dale derje docpějomne być. Klinika za dźěćacu a młodźinsku medicinu w ewangelskej chorowni Ludwigsfelde-Teltow je připowědźiła, zo so kónc julija zawrje. Chorownja we Wittstocku dyrbi so započatk 2027 zawrěć, ale wuchowanska straža na městnje wostanje.
16. nóc hrodow w Drježdźanach
To a tamne (23.07.26)
Wjelk je we wokrjesu Sprjewja-Nysa při wobchadnym njezbožu zahinył. Zwěrjo je wčera rano mjez Hochozu a Prjawozom (Fehrow) před awto běžał. Škoda zražki wučinja něhdźe 5 000 eurow. Šoferka njemóžeše ze swojim jězdźidłom dale jěć.
Zo bychu angažement hłowno- a čestnohamtskich čłonow wohnjoweje wobory, pomocnych organizacijow a Techniskeho pomocneho skutka, wojakow Zwjazkoweje wobory, rezerwistow a mocy policije a justicy hódnoćili, su CSU a Swobodni wolerjo w Bayerskej krajnemu sejmej chwatnu próstwu zapodali. Zaměr je, „Bayerski dźeń uniformy“ zawjesć. Tutón ma so jónu wob lěto na dobrowólnej bazy pod patronatom statneho knježerstwa a w dorěčenju ze zwjazkami dźěłodawarjow wotměwać.
Turistikarjo nadźijeja so spěšneje pomocy
Jědojte husańcy: W Błótach boja so dale a wjac storněrowanjow poskitkow za dowolnikow
Dubowy pućowanski přadnik (Eichenprozessionsspinner) zawinuje stres w dowolu. W Błótach su někotre groble zawrjene. Minjeny tydźeń pak su fachowcy zawěsćenske naprawy přewjedli, tak zo je so situacija trochu změrowała. Wupožčowarjo čołmow pak so boja, zo přichadźa mjenje dowolnikow do kónčiny. Turistiske zawody nadźijeja so spěšneje pomocy.
Wosrjedź prózdninskeho časa su dźěle daloko rozhałžkowanych groblow w Błótach zawrjene. To je šok za turistiske zawody, kiž wo prěnich storněrowanjach rozprawjeja. Delnje Błóta su mjeztym wosebje sylnje wot duboweho pućowanskeho přadnika potrjechene. Wobmjezowanjow za padlowarjow we woblubowanym dowolnym regionje dla hroža hospodarstwu wobchodniske straty. Klětu chce wobswětowe ministerstwo lěpje na to přihotowane być.
Trump znowa z cłami hrozy
Washington (dpa/SN). Prezident USA Donald Trump hrozy z nowymi cłami. Tónraz chce wón předewzaća, kotrež medikamenty produkuja, nuzować, zo so w USA zaměstnja. Wot lěća 2028 maja najprjedy za jedne lěto wosebite wotedawki we wysokosći 100 procentow na tak mjenowane generika płaćić, po tym ma cło na 200 procentow stupać, Trump na platformje Truth Social připowědźi. Generika su lěki, kotrež so markowym preparatam runaja, su pak zwjetša wo wjele tuńše.
Spominaja na wopory terora
Oslo (dpa/SN). Ludźo w Norwegskej spominaja dźensa na 77 smjertnych woporow terorowych nadpadow w Oslu a na kupje Utøya před 15 lětami, kotrychž wopory běchu předewšěm młodostni. Na wopomnjenskim zarjadowanju porěči tež ministerski prezident Jonas Gahr Støre. Po tym předčitaja mjena morjenych. Na kemšach wočakuja krala Haralda V. a kralownu Sonju. Tež přežiwjeni maja so słowa jimać. Popołdnju wotměje so wopomnjenske zarjadowanje na kupje Utøya.
Ródny dom Hitlera přetwarili
Po smjerći Marokkočana při zasadźenju policije su we wjacorych ...
Socialne medije zakazaja
Žadyn alkohol na dwórnišćach
Merz ze swójbu wopora telefonował
Berlin (dpa/SN). Zwjazkowy minister za nutřkowne naležnosće Alexander Dobrindt (CSU) je po smjertnym nadpadźe na studenta w Trieru potwjerdźił, zo so dale za to zasadźuje, chłostajomnych do Afghanistana wotsunyć. Towaršnosć ma prosće prawo na to, wón podšmórny. Minjenu srjedu je Afghaničan 22lětneho studenta w Trieru blisko uniwersity zakłół. Z njeznatych přičin je znajmjeńša dwójce z kuchinskim nožom do studenta kałnył.
Po smjertnym nadpadźe je zwjazkowy kancler Friedrich Merz (CDU) na swójbu wopora zazwonił. „To bě emocionalna rozmołwa“, nan morjeneho Thomas Dick zwurazni. Předewšěm mać swójby je za stronu CDU skutkowała. Staršej wojujetaj nětko za to, zo so tajki njeskutk nihdy njewospjetuje. Tole staj tež Merzej sposrědkowałoj.
Po informacijach porynsko-pfalcowskeho nutřkowneho ministerstwa bydli podhladny hižo dlěje hač dźesać lět w Němskej. Wón bě jako dźěćo bjez přewoda sem přišoł. Próstwu wo azyl drje su zarjady w lěće 2017 wotpokazali, přiwšěm pak zwěsćichu, zo njemóže so z kraja wupokazać.
