Biskopserbske wosady wopytał
Wotćah z města so dliji
Aleppo (dpa/K/SN). Powěsće nastupajo sewjerosyriske wulkoměsto Aleppo so kusaja. Jónu su je knježerstwowe jednotki hižo dospołnje zabrali, na tamnej stronje je rěč wo třěleńcach. Kaž ruske žórła praja, je so Assadowy režim z rebelemi dojednał, zo smědźa město wopušćić hromadźe z tysacami ciwilistow. Awtobusy za transporty su po powěsćach žurnalistow přihotowane. Dowjezć maja wone wšitkich do prowincy Idlib.
Wotsunu 50 Afghaničanow
Frankfurt n. M. (dpa/K/SN). Dźensa drje wotsunu prěni raz zhromadnje migrantow, kotřiž w Němskej njejsu azyl dóstali. Z Frankfurta nad Mohanom chcedźa 50 Afghaničanow z lětadłom do Kabula dowjezć. Rěčnica nutřkowneho ministerstwa je naprawu wobkrućiła. Organizacija za čłowjeske prawa Pro Asyl namołwja Zelenych w knježerstwach zwjazkowych krajow, wotsunjenju njepřipóznatych próstwarjow wo azyl zadźěwać.
Schulz so rozžohnował
Přirodoškitny zwjazk BUND Sakskeje zasadźa so za agrarnu změnu. Po ...
Dwójny etat rozjimać započeli
Drježdźany (SN/MkWj). Sakski krajny sejm je dźensa dwudnjowske zakónčace wuradźowanja wo dwójnym etaće swobodneho stata za 2017 a 2018 zahajił. Hišće nihdy w swojich stawiznach njeje Sakska telko pjenjez wudać móhła, kaž nětko za přichodnej lěće planuje: dobre 37,5 miliardow eurow.
Posedźenje bě so z raznej debatu wo politice krajneho knježerstwa zahajiło. Ministerski prezident Stanisław Tilich (CDU) pokaza na powšitkownje dobre hospodarske połoženje. Wón připowědźi wobšěrne inwesticije na polu digitalizacije a spěšneho interneta, zo by sakske hospodarstwo na wužadanja přichoda přihotowane było.
Frakciski šef Lěwicy Rico Gebhardt wšak kritizowaše, zo nima knježerstwo wotmołwy na palace politiske prašenja a na přiběracy populizm, ale zo dale čini kaž dotal. Připowědźene naprawy mjenowaše wón „nuzowe rozrisanja“, wosebje w šulskej politice. Korektury předewšěm na dobro dalšeho personala w statnej słužbje su po słowach Gebhardta wuslědk dotalneje wopačneje politiki skrótšenja we wšitkich wobłukach zjawneje słužby.
Emocialna debata wjelkow dla
Drježdźany (dpa/SN). Sakska chce nastupajo wjelči management něšto změnić, zapřijimajo při tym nazhonjenja z wukraja. Tole připowědźi wčera wobswětowy a agrarny minister Thomas Schmidt (CDU) na posedźenju krajneho sejma w Drježdźanach. Do toho bě plenum dosć emocionalnje debatował. Zapósłanc sakskeho sejma Jan Hippold (CDU) rjekny, zo z rosćacej populaciju tež konflikty mjez zwěrjećom a čłowjekom přiběraja. Na wsach knježa starosće a strach, dokelž so wjelki sydlišćam dale a bóle bliža. Zwjazkowe wobswětowe ministerstwo ma skónčnje zamołwitosć přewzać.
Zapósłanča Lěwicy w Sakskim krajnym sejmje Kathrin Kagelmann měnješe, zo njeje wjelča populacija problem, ale jednotliwe zwěrjata. Agrarny minister kaž tež politikarjo SPD a opozicije zwuraznichu, zo su hižo dźensa móžnosće, napadne wjelki morić. Z namjetom, zawjesć hranicu ličby wjelkow w Sakskej, je strona AfD zwrěšćiła.
To a tamne (14.12.16)
Z karu je 14lětny spytał 114 kilogramow praskotakow do Berlina pašować. Na němsko-pólskej mjezy w Frankfruće nad Wódru pak zastojnicy jeho z dźewjeć kistami ilegalneje pyrotechniki lepichu. Z regionalnym ćahom bě so młodostny wčera z něhdźe 8 600 praskotakami na puć do Berlinskeho měšćanskeho dźěla Wedding nastajił. Skedźbliwa wodźerka taksija, kotraž bě jeho na ćah dowjezła, pak zawoła policiju.
Znata rjekowka Wonder Woman njeje hižo dlěje pósłanča UNO. Comicowa figura chcyše so poprawom za zesylnjenje žonow w towaršnosći a boju wo runostajenje angažować. To pak zbudźi protest, dokelž njezastupuje figura feministiske zaměry. Zjednoćene narody su tuž nětko zhromadne dźěło z Wonder Woman zakónčili, zdźěli nakładnistwo, w kotrymž comic wuńdźe.
Mnohe domjacnosće chude
Berlin (dpa/K/SN). W Němskej je dale a wjace domjacnosćow kaž tež ludźi zadołženych. Tole wuchadźa z rozprawy zwjazkoweho knježerstwa wo chudobje, z kotrejež nowina Bild cituje. Loni je 2,05 milionow domjacnosćow zadołženych było, dwě lěće do toho 1,97 mio. Potrjechenych bě tuž loni 4,17 mio. ludźi. Jako přičinu přirosta zadołženja rozprawa mjenuje, zo ma spochi wjace ludźi přemało dochodow. Tónle trend traje mjeztym hižo něhdźe dźesać lět.
Hollande w němskej stolicy
Berlin (dpa/K/SN). Francoski prezident François Hollande je dźensa němsku stolicu wopytał. Při zhromadnym wobjedźe z kanclerku Angelu Merkel dźěše wo europske a mjezynarodne naležnosće. Po nowinarskej konferency wobdźělištaj so wonaj na němsko-francoskej konferency wo digitalizaciji hospodarstwa we woběmaj krajomaj. Wo zhromadnym dźěle we wobłuku digitalizowanja je wjace hač 300 načolnych ekspertow z předewzaćow wuradźowało.
Połoženje katastrofalne
Cyle swojorazna atmosfera knježi tele dny w juhochorwatskim ...
Trumpnoweho ministra powołał
Washington/Moskwa (dpa/SN). Jedne z najwažnišich personalnych prašenjow přichodneho knježerstwa USA zda so rozrisane być. Jednaćel mócneho wolijoweho koncerna ExxonMobil, Rex Tillerson, ma so w knježerstwje Donalda Trumpa z nowym wonkownym ministrom kraja stać. Trump je so jasnje za 64lětneho předewzaćela rozsudźił, wón dźensa sam we wosobnskej zdźělence rjekny. Nowina New York Times a sćelak CNN běštaj hižo wčera wo tym spekulowałoj, powołujo so na wokolinu Trumpa.
Z Turkowskej rěčeć abo nic?
Brüssel (dpa/K/SN). Za europske naležnosće přisłušni ministrojo krajow Europskeje unije su po dwaj dnjej trajacych wuradźowanjach w belgiskej stolicy wo přistupje Turkowskeje k zhromadźenstwu stejišćo wozjewili.
Z pohódnoćenja jasnje wuchadźa, zo je EU w tymle nastupanju pačena. Tak sej Awstriska doraznje žada, politiskeho wuwića w Turkowskej pod prezidentom Recepom Tayyipom Erdoğanom dla rozmołwy přetorhnyć, štož Nižozemska a Bołharska podpěrujetej. Porno tomu bě němski wonkowny minister Frank-Walter Steinmeier (SPD) před tym warnował. Hladać ma so na cyłkownu situaciju. We wóčku dźě dyrbja tež měć cypernski konflikt a zajimy turkowskeje opozicije.
Prašenje kónca rozmołwow by za Franka-Waltera Steinmeiera potom rozrisane było, by-li Turkowska smjertne chłostanje zaso zawjedła. To by „absolutnje čerwjena linija była“, němski wonkowny minister zwurazni.
