Słužbny telefon normalita
Berlin (dpa/SN). Słužbny mobilny telefon je w zawodach Němskeje přiběrajcy normalny zjaw. Kaž z aktualneho reprezentatiwneho woprašowanja digitalneho zwjazka Bitcom wuchadźa, dóstanje mjeztym 56 procentow wšěch přistajenych wot dźěłodawarja słužbne šmóratko. Před třomi lětami bě tutón podźěl hišće 46 procentow wulki.
Nimale wšitcy wužiwarjo słužbneho mobilneho telefona dóstanu při tym wosobinski nastroj za swójske wužiwanje. Jenož tři procenty dyrbja sej aparat z dalšim kolegu dźělić. Runočasnje podźěl priwatnych handyjow za powołanske zaměry dale woteběra a je so wot 36 procentow lěta 2023 na 26 procentow znižił.
Štóž je smartphone wot šefa dóstał, njetrjeba dwaj nastrojej wužiwać: 93 procentam wužiwarjow je dowolene, słužbne šmóratko tež priwatnje wužiwać (2023: 88 procentow). Jeničce tři procenty předewzaćow priwatne wužiwanje wuraznje zakazuje.
Ludźo tute rjadowanje witaja: 88 procentow potrjechenych słužbny handy priwatnje wužiwa. Jenož dźewjeć procentow so toho dobrowólnje wzdawa.
To a tamne (25.03.26)
Lěpši škit ludźi před škodami, kotrež alkohol zawinuje, žada sej zwjazk wjacorych organizacijow. Stajny poskitk alkohola měł wobmjezowany być, runje tak kaž wabjenje za njón, rěka w dokumenće, kiž je němska Centrala za prašenja chcyćiwosće wozjewiła. Tež płaćizny alkohola dyrbjeli so zwyšić. Naprawy přećiwo alkoholej za wodźidłom měli so zesylnić a konsekwentnje wutwarić. Sylnjenje prewencije přećiwo alkoholej a lěpše lěkowanje potrjechenych stej wažnej.
Zakaz socialnych medijow za dźěći pod 14 lětami chcetej Delnja Sakska a Durinska přesadźić. Wobě knježerstwje chcetej zhromadnu iniciatiwu w Zwjazkowej radźe za škit małolětnych zapodać. Předwidźane su krute kontrole staroby kaž tež wobmjezowany internetny přistup za młodostnych. Zwjazkowe knježerstwo měło so w EU za to zasadźeć.
SPD zaso strona dźěławych
Berlin (dpa/SN). SPD chce so po najnowšich wólbnych poražkach po słowach swojeho předsydy Larsa Klingbeila přichodnje bóle wo ludźi starać, „kotřiž dźěłaja“. Wobydlerski pjenjez njeje hižo tema SPD. „Naša tema su ludźo, kotřiž 3 000, 4 000 eurow zasłužeja. Jich žiwjenje chcemy polěpšić“, rjekny Klingbeil we wusyłanju sćelaka ntv „Pinar Atalay“. Minjene lěta je SPD přemało pokazała, zo je strona dźěławych, Klingbeil rjekny.
Söder: Reformy k swjatkam
Berlin (dpa/SN). Předsyda CSU Markus Söder chce wažne reformy koalicije CDU/CSU a SPD hač do swjatkow nastorčić. Najlěpje měło so wšitko mjez jutrami a swjatkami stać, rjekny ministerski prezident Bayerskeje nowinarjam tydźenika Stern. Wšitcy měli ideologiske zadźěwki přewinyć a so do dźěła dać. Zwyšenje dawka na njedobro derje zasłužacych wón wotpokazuje. To by była „plista wšěm zamołwitym srjedźneho stawa“. SPD bě sej tajke zwyšenje wospjet žadała.
Zelenskyj wumjetuje Ruskej
Wójna USA a Israela přećiwo Iranej so přiběrajcy tež w Israelu ...
Rjemjeslnicy: Strašne wuwiće
Dürr wotstupia znowa nastupi
Trump za zrěčenje z Iranom
Tel Aviv/Washington (dpa/SN). Israelski ministerski prezident Benjamin Netanjahu je so prěni króć k rozmołwam mjez USA a Iranon wo móžnym skónčenju wójny přećiwo Iranej wuprajił. „Prezident Trump je přeswědčeny, zo wobsteji šansa, zo hoberske wuspěchi, kotrež smy z wójskom USA docpěli, ze zrěčenjom manifestujemy“, rjekny Netanjahu we widejowym poselstwje. Israelski ministerski prezident zdobom potwjerdźi, zo z nalětami na Iran pokročuje. „Zničimy jich raketowy a atomowy program.“
Trump bě wčera wo „nadrobnych a konstruktiwnych rozmołwach“ z islamskej republiku rěčał, z kotrymiž chcedźa tutón tydźeń pokročować. Po jeho słowach su sej USA a Iran w cyłkownje 15 dypkach wo móžnym zrěčenju přezjedni. Iran je mjeztym kóždežkuli rozmołwy z USA dementował.
Israel chce ze wšej mocu tomu zadźěwać, zo Iran swójsku atomowu bombu twari. Iran prěje, zo tajke plany sćěhuje. Israel po njeoficialnych informacijach dawno atomowu bombu wobsedźi.
Intendant dróši hač kancler
Tež šefojo nalutowarnjow maja njewšědnje wysoke dochody
Drježdźany (SN/mb). Zwjazkowy kancler Friedrich Merz (CDU) dóstawa za swoje dźěło jako kancler po informacijach wokolnika za zjawnu słužbu něhdźe 230 000 eurow brutto na lěto. W zjawnosći kursěruja drje wyše ličby, štož z tym zwisuje, zo je Merz zdobom direktnje woleny zapósłanc zwjazkoweho sejma we wokrjesu Wysoka Sauerlandska a jemu tohodla hišće połojca diety a podźělna pawšala za kóšty běrowa zapósłanca přistejitej. Šefaj nalutowarnje Hornja Łužica-Delnja Šleska Grit Fugmann a Mario Häser mataj přerěznje 607 000 eurow na lěto, Fugmann jako předsydka něšto wjac, Häser něšto mjenje. To stej Leipziger Volkszeitung (LVZ) a Sächsische Zeitung (SZ) njedawno wotkryłoj, jako z kónčnych rozprawow dźesać najlěpje zasłužacych ludźi w zjawnych zawodach Sakskeje zwěsćištej. Ministerski prezident Michael Kretschmer drje mjez nimi njeje, ale intendant MDR Ralf Ludwig, kotryž dóstawa lětnje ca. 300 000 eurow.
