Washington (dpa/SN). Justicne ministerstwo USA je po informacijach medijow wjacorych sobudźěłaćerjow pušćiło, kotřiž běchu na přepytowanjach přećiwo nowemu prezidentej Donaldej Trumpej wobdźěleni. Komisariski justicny minister James McHenry dwěluje, zo potrjecheni zastojnicy „agendu prezidenta swěrnje přesadźa“, rozprawja mjez druhim nowina Washington Post. Nowu ­justicnu ministerku Pam Bondi dyrbi senat hišće wobkrućić. Tak dołho McHenry ministerstwo nawjeduje.

Trumpowy předchadnik Joe Biden bě zhromadnje z justicnym ministrom ­Merrickom Garlandom wurjadneho přepytowarja Jacka Smitha zasadźił. Tón měješe nadawk, wobchadźenje Trumpa z tajnymi dokumentami po skónčenju zastojnstwa 2021 přepytować, runje tak kaž jeho pospyty, wuslědk prezidentskich wólbow 2020 na swoje dobro změnić.

Smith bě swoje dźěło po wólbnym dobyću Trumpa 5. nowembra 2024 skónčił. Po jeho słowach je z wašnjom, zo pře­ćiwo amtěrowacym prezidentam nje­přepytuja. Hewak bychu Trumpa drje wólbneho wobšudnistwa dla zasudźili.

W Zhorjelskim wokrjesu so dale wjele ludźi wo azyl prócuje

Zhorjelc (AK/SN). Zhorjelski wokrjes chce azyl pytacych dale po cyłym wo­krjesu centralnje a decentralnje zaměstnić. Azyl je tam tež lětsa wulki tema. Tole podšmórny krajny rada dr. Stephan Meyer (CDU) minjeny štwórtk w Zhorjelcu. W planowanskim rumje Běła Woda wostanje centralny zhromadny přebytk w Hamorje, prawdźepodobnje budźe tam hač do klětušeje meje. Potom chce předewzaće Łužiska energija a milinarnje (LEAG) twarjenje bywšeje powo­łanskeje šule při milinarni wužiwać. Wokrjes prócuje so wo centralne zaměstnjenje azyl pytacych w Běłej Wodźe. „Zhromadnje z městom spytamy situaciju swědomiće rozrisać“, krajny rada zwurazni. „W fokusu su wjacore stejnišća. To maja jednore twarjenja być, kotrež žadanjam wotpowěduja.“

Štož zdawaše so spočatnje žort z knihi kołwrótnosćow noweho prezidenta USA Donalda Trumpa być, nabywa mjeztym konkretne formy. Ministerska prezidentka Danskeje Mette Frederiksen je so z wodźacymi politikarjemi Europy zetkała, zo by so jich prašała, što bychu woni na jeje městnje činili: Trump žada sej Grönlandsku. Mjeztym je Danska jako wobse­dźerka kupy hižo srědki za nowe wójnske łódźe zaplanowała, kotrež maja kupu škitać. Kajka to absurdna situacija: Wodźaca móc NATO žada sej wot jednoho z jeje ­čłonow toho kraj.

Zajimawe budźe, hač so Trump ze ­swojim wašnjom „wikowanja“ přesadźi: Něšto poskićić a jeli tamny z tym přezjedny njeje – jemu hrozyć. W tym padźe z cłami, sankcijemi abo po ameriskim wašnju z namocu. W padźe Grönlandskeje hrozy nětko groteskny konflikt mjez zapadnej Europu a USA. Nazorna to pokazka, kak jara sej Trump Europjanow na tamnym boku Atlantika waži. Marko Wjeńka

Berlin (dpa/SN). Po tym zo je masy dwórnišćowych twarjenjow předawała wobsedźi Němska železnica jenož hišće mjenje hač štwórćinu wšěch 2 900 dwórnišćowych halow Němskeje. Pjećina je w komunalnym wobsydstwje, kaž je přepytowanje zajimoweho zwjazka Allianca za kolije wunjesło. Wjace hač połojca twarjenjow słuša priwatnym wobsedźerjam.

Priwatne wobsydstwo na dwórnišćach je wosebje na wuchodźe Němskeje roz­šěrjene, zwjazk zdźěli. Načolne městno zaběra tule Mecklenburgsko-Předpomorska. Z cyłkownje 130 dwórnišćowych twarjenjow słuša w tutym zwjazkowym kraju wjace ha sto priwatnym wobsedźerjam, to je wjace hač 80 procentow.

Priwatni wobsedźerjo twarjenja zwjetša za priwatne abo komercielne zaměry přetwarja, nic pak hižo za klasiski železniski wobchad. Na mnohich městnach objekty prosće rozpaduja. Allianca za kolije žada sej tohodla powabki za priwatnych abo komercielnych wobsedźerjow, zo bychu dwórnišća za železniski wobchad zachowali. Tole słuša k wobchadnej změnje, jednaćel zwjazka Dirk Fliege zdźěli. Twarjenja měli zaso atraktiwne być.