Cristiano Ronaldo, kotryž so po wšěm zdaću posledni raz na swětowym mišterstwje wobdźěli, wojowaše wčera wječor z narodnym mustwom Portugalskeje wo zaćah do přichodneho koła. Španiska njebě na žadyn pad lochki přećiwnik. Duel wotmě so w stadionje w texaskim Dallasu (USA) před něhdźe 70 000 přihladowarjemi. Za neutralneho přihladowarja běše to perfektna hra, tola bě wona to tež na trawniku? Haj, wšako bě wona połna móžnosćow za wobě mustwje a wurunana. Dołho postajowaše partiju defensiwna stabilita a ofensiwnych akcijow bě mało­. Španiska měješe drje husćišo bul a wjace šansow, namaka pak jenož zrědka rozrisanje přećiwo kompaktnemu zakitowanju Portugalčanow. Mikel Oyarzabal je zahe wulku móžnosć za nawjedowanje zapasł. Portugalska měješe předewšěm přez Nuna Mendesa krótko do přestawki šansu. Jeho třělba pak jenož prěkuš wrotow trjechi a bul skoči wróćo na hrajnišćo. Cristiano Ronaldo wosta porno tomu w dalokej měrje njenapadny a měješe w cyłej hrě jenož­ 16 kontaktow z bulom. Španičenjo mějachu tróšku wjace podźěla na hrě.

Robert Habeck, něhdyši wicekancler a zwjazkowy­ hospodarski minister, ma po połdra lěće nowy powołanski nadawk. Spočatk awgusta nastupi wón jako poradźowar pola danskeje inwestmentoweje towaršnosće Urban Partners, kotraž skutkuje na polu wuwiwanja městow. Habeck ma předewzaću z hłownym sydłom w Kopenhagenje pomhać, swoje wobchodniske aktiwity na polu socialneho bydlenjotwara rozšěrjeć.

Dožiwjenska wjeska znateho němskeho předewzaća Karls Tourismus w sakskim Döbelnje ma nowu atrakciju za młody a starši publikum. Njedźelu je tam předewzaće, kotrež je nic naposledk tež swojich słódnych truskalcow dla znate, seklowu čaru (Achterbahn) za swójby wotewrěło. Wona je tak konstruowana, zo wozyčki přespěšnje po njej njesmala.

Praha (B/SN). W srjedźowěkowskej katedrali swjateho Wita na Praskich Hradčanach su nowe pišćele ze 121 registrami a 5 755 pišćelemi a pišćałkami poswjećili. Arcybiskop Stanislav Přibyl wuzběhny, zo ma katedrala nětko nowy hłós, „kiž njebudźe ze słowami rěčeć, ale k wutrobam ludźi“. Pišćeletwarc Gerhard Grenzing z Barcelony so wjeseli, zo wuměłstwowa twórba hudźbje, liturgiji a architekturje katedrale słuži. Wuměłc Peter Olah je jednotliwe pišćałki a pišćele ze 180 čěskimi kristalemi wobdał.

AfD cyrkwi napřećo njepřećelska

Köln (B/S). Magdeburgski biskop Gerhard Feige postorkuje so na njepřećelskosći strony AfD napřećo cyrkwi w Saksko-Anhaltskej. Wón w rozhłosu Deutschlandradio zwěsći: „Hižo w NDR sym dožiwił, zo je stat cyrkej wusměšował. Ale tajke intensiwne wusměšowanje, swary a wukonjenje ćišća kaž nětko su nowu kwalitu docpěli.“ Biskop doda: „Smy dźakowni, zo smy ze židowskimi sobuwobydlerjemi, z muslimskimi a druhimi nabožinami kaž tež z wukrajnymi křesćanami derje zhromadnje žiwi.“

Islamizm w Němskej

Peking (dpa/SN). Wójsko Chiny přewjedźe wot dźensnišeho hromadźe z ruskimi wójnskimi łódźemi w pacifiskim oceanje blisko sewjero-chinskeho po­brjóžneho města Qingdao wojerski manewer. Po informacijach wojerskich zamołwitych Chiny je při tym wojerski nurjak­ chinskeho wójska tež strategisku raketu wottřělił. Zamołwići wuzběhnu, zo so wuspěšny test přećiwo konkretnemu krajej měrił njeje.

Dalše kročele trěbne

Berlin (dpa/SN). Předsyda SPD Lars Klingbeil měni, zo su tež po dojednanju koalicije na reformowy paket dalše kročele trěbne. Dojednanja CDU, CSU a SPD „njejsu scyła přičina, zo so spokojnje wotpočujemy. Smy dotal jenož mały čwak dołheho procesa zmištrowali, nic wjace a nic mjenje“, wuzběhny wón we wusyłanju „Lěćny interview“ sćelaka ARD. Klingbeil warnowaše, zo paket reformow w jednanjach zwjazkoweho sejma přejara roztřěskaja.

Polěpša naćisk reformy