SPD šwika ministerku CDU
Berlin (dpa/SN). W zwisku z debatu wo móžnych wolóženjach šoferow wysokich płaćiznow bencina a diesela dla je SPD hospodarsku ministerku Katherinu Reiche (CDU) wótrje kritizowała. „Mam sprawnje prajene zaćišć, zo Katherina Reiche wobydlerjow jich dóńtej přewostaja“, rjekny prěni parlamentariski jednaćel frakcije SPD w zwjazkowym sejmje Dirk Wiese. Ministerce njeje wočiwidnje wědome, kajka kriza Němsku při wospjetnym přiwótřenju połoženja wočakuje, Wiese rjekny. „Dyrbi so nuznje něšto stać. Hospodarska ministerka pak dotal ničo nječini.“
Wot unije CDU/CSU namjetowane zwyšenje pawšale za dojězdźowarjow nima SPD za dosahace.
Hormuski přeliw dale zawrjeny
Teheran (dpa/SN). Iran chutnje wo tym rozmysluje, dojednany dwaj tydźenjej trajacy přiměr z USA dočasa wupowědźić. Přičina su najnowše masiwne nalěty Israela na Libanon, při kotrychž je wčera wjace hač sto ludźi žiwjenje přisadźiło. Nalěty měrjachu so na milicu Hisbollah, kotraž je kruće z Iranom zwjazana.
Runočasnje hrožeše Iran Israelej z dalšimi raketowymi nadpadami, jeli z nalětami na Libanon pokročuje. Mjeztym je Iran Hormuski přeliw zaso zawrěł, štož rani dojednanje z USA.
Tež generalny sekretar UNO António Guterres je nalěty Israela na Libanon zasudźił. Israelski ministerski prezident Benjamin Netanjahu kritiku wotpokazuje a twjerdźi, zo dojednanje wo přiměrje južny Libanon njepotrjechi. Iran wumjetuje Washingtonej, zo nalětam Israela na Hisbollah w Libanonje přihladuje, chiba zo hižo scyła žadyn wliw na Netanjahuwa a toho mustwo nima.
Iran a USA chcetej zajutřišim, sobotu, w pakistanskej stolicy Islamabadźe wo měrowym rozrisanju wuradźować.
Tež mjeńšinje zastupjenej
W Słowjenskej maja wosebity wólbny system za narodne mjeńšiny
Felice Zizu bu třeći raz jako zastupjer italskeje mjeńšiny do słowjenskeho parlamenta woleny. Italski dźenik „La Voce del Popolo“, kotryž w měsće Fiume/Rijeka wuchadźa, piše, zo bě sej z města Pola/Pula pochadźacy lěkar 42 procentow hłosow zdobył. 66,5 procentow 2865 wólbokmanych italskeje mjeńšiny bě so na wólbach wobdźěliło.
Słowjenska připóznawa dwě narodnej mjeńšinje: italsku a madźarsku. Woběmaj garantuja jedne sydło w słowjenskim parlamenće. Wólbokmani přisłušnicy mjeńšinow wola při wólbach parlamenta tuž dwójce: Jónu wobdźěla so na normalnych wólbach po stronach, z druhim wólbnym lisćikom wothłosuja, štó jich mjeńšinu w parlamenće zastupuje.
Madźarsku zhromadnosć budźe znowa Ferenc Horváth zastupować. Wón je sej 72,7 procentow hłosow zdobył a doby z tym před swojim napřećiwnym kandidatom Tomijom Horvatom. Tole zdźěli dźenik „Primorski Dnevnik“, kotryž w Triesće wuchadźa.
Moraliska apokalypsa
Fachowe wiki za bio-wudźěłki
Lipsk (dpa/SN). Bio-wudźěłki so dźeń a lěpje předawaja. Na regionalnych wikach BioOst w Lipsku chcedźa kónc tydźenja nowe produkty a posłužby za fachowe wikowanje, bio-wobchody a hosćency předstajić. Na wustajenišću Sakskeho hospodarskeho spěchowanja prezentuje so 16 wustajerjow. Prěni króć wotměja so wiki dwaj dnjej a su wšěm zajimcam přistupne.
Po informacijach sakskeho ratarskeho ministra Georga-Ludwiga von Breitenbucha (CDU) je poskitk bio-wudźěłkow přiběrajcy wažny wobstatk sakskeho ratarskeho a zežiwjenskeho hospodarstwa. „Sakske bio-zawody su so na rozrost nastajili a swoje wudźěłki na dale a wyšim niwowje poskićuja“, wón rjekny.
Nawoda Sakskeho hospodarskeho spěchowanja Thomas Horn sej chwali, zo su wiki tež přetrjebarjam přistupne. Wustajerjo maja tak składnosć, so direktnje z kupcami rozmołwjeć a wosobinske měnjenje ludźi wo produktach zhonić.
Biologiske ratarstwo w Sakskej spochi rosće. Lěta 2025 je płonina wo nimale 3 000 hektarow rozrostła. 10,3 procenty wšeje ratarskeje płoniny Sakskeje mjeztym biologisce wobhospodarja.
Baćon Bernd zaso w hnězdźe
Žadyn skót do Bliskeho wuchoda
Drježdźany (dpa/SN). Sakska je nachwilnje wšitke transporty žiweho skotu do Bliskeho wuchoda zakazała. Přičina su wojowanja a njestabilne wěstotne połoženje w regionje. „Derjeměće skotu na dołhej jězbje a nic naposledk strowotu a wěstotu jón přewodźacych ludźi njemóžemy tuchwilu zaručić“, zdźěli socialna ministerka Petra Köpping (SPD) w Drježdźanach. Kak so wčera dojednany přiměr mjez USA a Iranom na rozsud wuskutkuje, chcedźa pruwować. Tak dołho dyrbja předawanje wužitnych zwěrjatow do wot wójny potrjechenych krajow a tež do susodnych krajow přetorhnyć.
Po słowach ministerki móža njewočakowane změny a wobjězdki transport podlěšić. „Tak přiběra tež riziko za stres, zranjenja a ćerpjenje skoćatow. To njemóžemy akceptować.“
Socialne ministerstwo je do procesa přizwolenja tajkich transportow zapřijate. Z wukazom su weterinarnym zarjadam kazali, próstwy wo transport skotu wotpokazać. Potrjechene su nimo Israela a Palestiny tež Libanon, Jordaniska, Syriska, Irak, Iran, Kuwait, Oman, Zjednoćene arabske emiraty, Katar a Jemen.
To a tamne (09.04.26)
Fanowu kulturu motorsportoweho wubědźowanišća Sachsenring pola Hohensteina-Ernstthala su do sakskeje krajneje lisćiny imaterialneho kulturneho herbstwa zapisali. Wo tym je ministerka za kulturu a turizm Barbara Klepsch informowała. Sakska chwali sej kulturnu formu, kotraž je tam hižo lětdźesatki typiska a kiž skutkuje daloko za mjezami Sakskeje. Hač Sachsenring tež do cyłoněmskeje lisćiny zapisaja, chcedźa kultusowi ministrojo klětu rozsudźić.
Cyrkej za 99 000 eurow je w Erfurće na předań. Tamniša wosada swj. Ławrjenca poskićuje cyrkej jako hrabnjenčko, nowiny rozprawjeja. We wotpowědnym nawěšku rěka, zo móhli sej předstajić, zo so dom w spirituelnym, kulturnym abo socialnym wobłuku dale wužiwa. Spadowaceje ličby wěriwych dla tam hižo žane Bože słužby njeswjeća.
Busy znowa njepojědu
Drježdźany (dpa/SN). Na wuchodnu Saksku so přichodne koło warnowanskich stawkow w regionalnym bliskowobchadźe měri. Dźěłarnistwo Verdi namołwja dźěłopřijimarjow we wokrjesach Zhorjelc, Budyšin, Sakska Šwica-Wuchodne Rudne horiny, Mišno a Drježdźany wot štwórtka hač do njedźele stawkować. Potrjechene su wobchadne předewzaća RBO, GVB, VGH, DVS, VGM a RVSOE, dźěłarnistwo zdźěli. Tramwajki, busy a přewozy zawoda DVB w Drježdźanach porno tomu po planje pojědu.
Pozadk nowych stawkow su dlijace so tarifowe jednanja ze Zwjazkom dźěłodawarjow bliskowobchada, kotrež po informacijach Verdi tež w pjatym kole jednanjow wuslědki wunjesli njejsu. Strona dźěłodawarjow dale žane bytostne powjetšenje finančneho ramika njeposkićuje. Tež centralne žadanja kaž polěpšenje dźěłoweho časa w změnach a wjace lětneho dowola dźěłodawarjo dale zańć nimaja. Nawoda jednanjow ze stron dźěłarnistwa, Sven Vogel, připowědźi w přichodnych tydźenjach dalše, wjetše a wobšěrniše stawki, kotrež nětko hižo planuja.
Teheran swjeći swoje dobyće
Teheran (dpa/SN). W iranskej stolicy Teheranje su po wozjewjenju přiměra wobydlerjo na dróhu šli. Na Naměsće rewolucije w centrumje města zhromadźichu so přiwisnicy knježerstwa. Prezident USA Donald Trump je so žadanjam Irana podwolił, rěčnicy wołachu. „Pozicija Irana w Hormuskim přeliwje je sylnjena. To je dobyće Irana. To je wjećba přećiwo tomu, kiž twjerdźi, zo ma najwjetše a najlěpše wójsko swěta“, tam rěkaše.
Sewjerna Koreja rakety testuje
Seoul (dpa/SN). Sewjerna Koreja je po informacijach wójska Južneje Koreje wjacore rakety krótkeje distancy do směra na wuchod startowała. Rakety padnychu skónčnje do Japanskeho morja, po tym zo běchu 240 kilometrow lećeli. Hižo wčera bě Sewjerna Koreja raketu startowała, kotruž njemóžachu w Južnej Koreji prawje identifikować. Wočiwidnje jedna so wo zwrěšćeny start. Po rezoluciji UNO je Sewjernej Koreji zakazane, balistiske rakety startować.
Nowa koalicija w Mainzu?
