To a tamne (20.07.26)
Za čas njewjedrja na horach w šwicarskim kantonje Wallis je w nocy na minjenu sobotu 97 wowcow zahinyło. Něhdźe 80 zwěrjatow je přežiwiło. Błysk je do stadła wowcow dyrił, kotrež wusko hromadźe na zawěsćenej pastwje steješe. Zo so skót na horach z płotom zawěsća, je njezwučene. Tola nadpadow rubježnych zwěrjatow dla, dyrbja skót někak škitać. Kadawry wowcow je helikopter z hory wotewzał. Po dlěšej horcoće su tele dny njewjedra po Alpach w Šwicarskej. Wjedrowa słužba je minjeny štwórtk w běhu něšto hodźin 26 000 błyskow naličiła.
Blisko pobrjoha w Schleswigsko-Holsteinskej su ludźo minjeny štwórtk wjelrybu wuhladali. Wideja a wobrazy Němski mórski muzej wuhódnoći. Po wšěm zdaću je to wjelryba, kotraž w minjenych tydźenjach před Danskej přebywaše.
Trójce zadobyće wotwobarali
Waršawa (dpa/SN). Tři dny za sobu su honjaki pólskeho wójska nad Baltiskim morjom do teritorija Pólskeje zadobywace so ruske bojowniske lětadła wotpopadnyli. Po měnjenju zakitowanskeho ministra Wladysława Kosiniak-Kamysza testuje Ruska na tute wašnje wukonliwosć pólskich lětanskich wotwobaranskich systemow. Zadobyća wotměchu so blisko Malborka a před pomorskim baltiskim pobrjohom pola sydlišća Jastrzębia Góra, najsewjernišeho městna Pólskeje.
Jednotku EU za škit Libanona
Berlin (dpa/SN). W zwisku z kónc lěta w Libanonje so kónčacej misiju Zjednoćenych narodow (UN) namjetuje zwjazkowy wonkowny minister Johann Wadephul (CDU), tam město toho wojersku jednotku z EU-mandatom pósłać. Namjet měli zamołwići EU pruwować, zo njeby w regionje wěstotny wakuum nastał. Z tym bychu wuměnjenje za to stworili, zo so israelske wójsko wróćo sćehnje a zdobom nawrótej islamistiskeje milicy Hisbollah zadźěwali.
Trump wobwinuje Chinu
Hižo wot póndźele wojuja wohnjowi wobornicy a ciwilni pomocnicy ...
Macron wopyta Merza
Kyjiw: Přećiwo pušćenju protestowali
Kyjiw (dpa/SN). Na wčerawšim dnju wólbow noweho knježerstwa w ukrainskim parlamenće je něhdźe 2 000 přewažnje młodych ludźi w ukrainskej stolicy přećiwo pušćenju zakitowanskeho ministra Mychaila Fedorowa demonstrowało. 35lětny politikar je mjez Ukrainjanami swojich prócowanjow wo reformy dla woblubowany. Wón běše přećiwo korupciji w statnym aparaće postupował. Hakle předwčerawšim je Zelenskyj wozjewił, zo nochce Fedorowa znowa jako zakitowanskeho ministra namjetować. Jako přičinu mjenowaše konflikt Fedorowa a nawody ukrainskeho wójska Oleksandra Syrskim. Město Fedorowa je Zelenskyj nawodu tajneje słužby Jewhenija Chmaru namjetował.
Na ministerskeho prezidenta je wjetšina zapósłancow ukrainskeho parlamenta dotalneho nawodu statneho energijoweho koncerna Naftogaz Serhija Korezkyja wuzwoliła. Rozhorjena diskusija mjez parlamentariskimi zapósłancami pak běše personalije stareho a noweho zakitowanskeho ministra dla nastała.
„Zakładny rozhłós“ realistiski?
AfD w Saksko-Anhaltskej chce regionalniši a tuńši rozhłós bjez MDR
Magdeburg (dpa/SN). Na zjězdźe saksko-anhaltskeho krajneho zwjazka AfD minjeny kónc tydźenja w Magdeburgu je načolny kandidat Ulrich Siegmund mjez druhim lisćinu naprawow předstajił, kotrež chcyła strona w prěnich sto dnjach po krajnych wólbach zwoprawdźić, je-li sej absolutnu wjetšinu w parlamenće zdobyła. Hnydom na prěnim městnje steji wupowědźenje rozhłosoweho statneho zrěčenja z MDR, dokelž chce strona „wobydlerjow wot nanućeneho rozhłosoweho popłatka kaž tež wot desinformacije w kraju wuswobodźić“.
Priwatny rozsud Spahna kritizuja
Islamistiski motiw njewidźa
„Bajkojty“ poskitk w Bórkowach
Wulke mišterstwo so nachila
Jenož hišće dwě hrě, potom je lětuše swětowe mišterstwo w kopańcy w USA, Kanadźe a Mexiku tež hižo zaso nimo. Sobotu wojujetej wubrance Francoskeje a Jendźelskeje wo třeće městno, dźeń pozdźišo wotměje so wulke finale mjez Španiskej a Argentinskej.
Njedźelu skónči so potajkim dotal najwjetše swětowe mišterstwo, na kotrymž je 48 narodnych mustwow w běhu 39 dnjow w 16 stadionach třoch krajow dohromady 104 hrow absolwowało. Startowali běchu 11. junija w swětoznatym stadionje Actekow w stolicy Mexika. Tam wotmě so prěnja hra mjez mustwomaj Mexika a Južneje Afriki. Z njeje zahaji so dosć kuriozny turněr – a to na trawniku kaž tež zboka njeho. Tak wobdźěli so na přikład prěni raz kupowy kraj Curaçao, kotryž ma jenož 155 000 wobydlerjow, jako najmjeńši stat na mišterstwje. Wjele je so wo nowej přidatnej přestawce w kóždym połčasu hry – „hydration break“ – diskutowało. Běchu to woprawdźe pitne přestawki abo jenož wabjenske přetorhnjenja za někotryžkuli sćelak?
