Z běrokratiju drje ma w našim kraju kóždy swoje nazhonjenja. Wona so kaž brjód we wšitkich wobłukach wšědneho žiwjenja rozpřestrěwa a naš wšědny dźeń na rozdźělne wašnje haći. Najnowši přikład je, zo je 13 lět trało, doniž njemóža pola Dobrošec kolesowanski puć do směra na Budyski spjaty jězor twarić. Haj, twarske předpisy dyrbja so dodźeržeć a prawnisce dyrbi wšo w porjadku być. Ale dyrbi to takle dołho trać? To samsne prašeja so ći, kotřiž sej na přikład w Zejicach dawno hižo kružny wobchad přeja. Tež tam dyrbja so prawniske předpisy dodźeržeć. Runje tole cyły proces tak mjenowaneho zwěsćenja plana do dołhosće ćehnje. Wobaj přikładaj zaso raz pokazujetej, zo dyrbi so běrokratija wot­twarić. Wo tym so na zwjazkowej runje tak kaž na krajnej runinje dawno hižo rěči. ­Komisije a dźěłowe kruhi so z tym zabě­raja, ale změniło so dotal po wšěm zdaću wjele njeje. Nadźija drje jako poslednja zańdźe, poněčim pak na tym dwěluju, zo so situacija hdy polěpši. Marian Wjeńka

Pod hesłom „Zhromadnje do dźěła so dać“ su wobydlerjo Choćebuza minjeny kónc tydźenja mjeztym 17. nalětnje rjedźenje přewjedli a poslednje powostanki minjeneju nazymy a zyma wotstronili. Zhromadnje zhrabachu lisćo a wurjedźichu zelenišća, hrajkanišća a zjawne městna, tak swoje město porjeńšejo. Organizatorojo chwa­lachu sej wulku ličbu wobdźělnikow. Choćebuske transportne předewzaće ALBA ­akciju tež lětsa zaso skutkownje podpěrowaše: Zawod staji kontejnery za lisćo a zelene wotpadki k dispoziciji a přewza transport. Foto: Michael Helbig

Před Wismarskim pobrjohom Baltiskeho morja tčaca wjelrybje so špatnje wjedźe. Tole zwěsćeja fachowcy Stralsundskeho mórskeho muzeja. Rybu běchu minjeny tydźeń před Timmendorfskim pobrjohom z pomocu bagra z pěska wuswobodźić móhli. Bórze po tym wosta wona znowa w niłkej wodźe tčacy. Jeje strowotny staw je so pohubjeńšił, frekwenca dychanja je dale a słabša.

Wjace hač 10 000 eurow škody dźiwjeho swinjeća dla je při njezbožu nakładneho awta na awtodróze A 4 njedaloko durinskeho města Gotha nastało. 65lětny šofer bě wodźidło nabok storhnył, jako swinjo njejapcy před sobu wuhlada. Na to zrazy nakładne awto do nabóčneho wohrodźenja a wosta na kromje jězdnje stejo. Při tym roztorha so wolijowa wań motora, na čož tójšto wolija wuběža. Awto dyrbjachu wotwlec. Dźiwje swinjo so zminy.

Vaux-de-Cernay (dpa/SN). Čłonske kraje skupiny G7, sydom hospodarsce najwjetšich demokratijow, su dźensa z wonkownym ministrom USA Marco Rubijom za zhromadnej liniju k skónčenju wójny w Iranje pytali. Zwjazkowy wonkowny minister Johann Wadephul (CDU) sej wot USA žadaše, zo měli Europu do wójnskeho planowanja zapřijeć. Rubio wospjetowaše kritiku prezidenta USA Donalda Trumpa, zo njejsu zwjazkarjo NATO pomhali, jako běchu jich USA wo to prosyli.

Narunaja Riesterowu rentu

Berlin (dpa/SN). Zwjazkowa rada chcyše dźensa wo reformje priwatneho starobneho zastaranja rozsudźić, z čimž ma so dotalna Riesterowa renta narunać. Nowe móžnosće lutowanja a spěchowanja maja tomu dopomhać, zo móže wjace ludźi pjenjezy za čas staroby składować. Wo­sebje pomhać chcedźa tež tym, kotřiž ­nimaja niskich dochodow dla móžnosć, sej wjele pjenjez nalutować. Tež swójby chcedźa lěpje podpěrować.

Wadźa so wo honorary