Berlin (dpa/SN). Wot zwjazkoweho knježerstwa zasadźena komisija je dźensa wo raznje přiběracych płaćiznach ćěriwa a energije wuradźowała. Na tym su so tež zastupnicy koncernow mineralneho wolija wobdźělili. Přitomni běchu nimo ­toho tež prezident zwjazkoweho karteloweho zarjada Andreas Mundt a politi­karjo zwjazkoweho sejma. Hladajo na widźomnje stupace płaćizny běchu wjacori politikarjo koncernam wumjetowali, zo ludźi njetrjebawšo „wotkasěruja“. Branša tole wotpokazuje. Fachowcy nimo toho na to pokazuja, zo njejsu płaćizny w žanym europskim kraju takle masiwnje rozrostli kaž w Němskej.

Zwjazkowe knježerstwo je minjene dny wjacore naprawy připowědźiło. Tak chcedźa tankownjam po přikładźe Awstriskeje přichodnje předpisać, zo smědźa płaćizny jenož jónu wob dźeń zwyšić. Znižić smědźa płaćizny porno tomu kóždy čas. Nimo toho chcedźa kartelowe prawo přiwótřić, zo móhli jednorišo přećiwo wulkim wolijowym koncernam a jich płaćiznowej politice postupować.

Hormuska dróha za łódźe dale blokowana – nowe nalěty na Iran a Israel

Washington (dpa/SN). We wójnje přećiwo Iranej sej prezident USA Donald Trump wot zwjazkarjow NATO z chětro konfrontowacymi słowami žada, zo měli wolijowe transporty w Hormuskej dróze zaručić pomhać. Jeli partnerojo w tym nastupanju USA njepodpěruja, steji ­NATO před struchłym přichodom, rjekny Trump nowinarjam Financial Times. Jeli „žana reakcija njedóńdźe abo reakcija ­negatiwnje wuńdźe, budźe tole jara špatnje za přichod NATO“, nowinarjo Trumpa cituja.

Wójny USA a Israela přećiwo Iranej dla je wobchad łódźow w Hormuskej dróze, kotraž je jara wažna za mjezynarodny transport zemskeho wolija a běžiteho płuna, praktiske zlemjeny. Wall Street Journal rozprawja po informacijach zastojnikow USA, zo chcedźa wjacore kraje koaliciju załožić, kotraž chce łódźe přez chětro wusku mórski dróhu přewodźeć. Tole je knježerstwu we Washingtonje znate.

Zajimawy přinošk wo wójnje přećiwo Iranej móže sej kóždy w interneće wobhladać. W lěće 2012, před 14 lětami, je němski žurnalist a fachowc za Bliski wuchod Michael Lüders připowědźił, što so stanje, jeli USA a Israel woprawdźe Iran nadpadnu. Konflikt wokoło pozdatneho atomoweho programa Irana bě hižo tehdy aktualny. Lüders skrótka a jadriwje naliči: „Dokelž njemóže so Iran hoberskej wojerskej namocy ze swojim wójskom wobarać, by wón činił, štož zapadny swět najbóle boli: By Hormusku dróhu blokował. Dosaha, jenički wolijowy tanker wobškodźić, a žana łódź sej hižo přez wusku mórsku dróhu jěć njezwěri. Płaćizna wolija by hnydom ‚rozbuchnyła‘ a wjacorym krajam by prawje bórze infarkt hrozył.“ Wšo tole je so mjeztym stało. Wočiwidnje we Washingtonje žadyn internet nimaja abo zamołwitym w Běłym domje tole hišće nichtó rjekł njeje. Aroganca a swojowólnosć njenarunatej mudru politiku. Sćěhi toho nětko widźimy. Marko Wjeńka

Z plěchom na Instagramje je so předsydka badensko-württembergskeje FDP Nicole Büttner předstajiła. „Sym so sadźiła, sym přěhrała a nětko sym swoje přilubjenje zwoprawdźiła“, rjekny Büttner w krótkim wideju. Pozadk toho je ­poražka FDP w njedawnych wólbach krajneho sejma w Badensko-Württembergskej. Tam bě strona na mjezy pjeć procentow zwrěšćiła a tak ze sejma zlećała. Do wólbow bě Büttner přilubiła, zo da sej w tymle padźe plěch třihać.

Na swětowym mišterstwje młodych pjekarjow w Taiwanje je sej němske mustwo třeće městno zdobyło. Olympiske rynki z chlěboweho ćěsta a z olympiskim wohenjom su jurorow přeswědčili. Němsku zastupowaštaj němska mišterka młodźiny Lilly Jahn z Frankfurta nad Wódru a Jonah Rosentreter z Essena.